Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 192 Hüküm no: 132 Orijinal metin no: [13a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Galata Kadısı Abdülbaki Efendi’nin bahçesini kiraya verdiği Hüseyin b. Mehmed’de kira alacağı olduğu iddiasıyla açtığı davada; Hüseyin’in kabul ettiği miktardaki borcunu ödemesine ve Abdülbaki Efendi’nin de fazla olarak iddia ettiği parayı ispat etmesine karar verildiği Ma‘rûz Sâbıkā Galata kādısı fazîletlü Abdülbâki Efendi neclü’l-merhûmi’l-mebrûr el-Hâc Mustafa Efendi’nin kethudâları ve taraflarından ber-vech-i âtî vekîlleri olduğu Abdullah Efendi b. Abdullah ve es-Seyyid Ebûbekir Ağa b. Veli nâm kimesneler şehâdetleriyle sâbit olan Mustafa Efendi b. İbrahim nâm kimesne medîne-i Üsküdar’da mahfil-i bâbda meclis-i şer‘-i hatîrde Hüseyin b. Mehmed nâm kimesne muvâcehesinde müvekkilim mûmâ-ileyh emlâkinden olup medîne-i mezbûrede Toygar Hamza mahallesinde vâki‘ ma‘lûmü’l-hudûd bir kıt‘a şükûfe bağçesini târih-i i‘lâmdan üç buçuk sene mukaddem beher sene yirmi iki guruş ücret tesmiyesiyle mezbûr Hüseyin’e îcâr ol dahi ba‘de’l-istîcâr bağçe-i mezkûrede üç sene sâkin olup sinîn-i mezkûrede bağçe-i mezkûr ücretinden zimmetinde müctemi‘ olan altmış altı guruşu bi’l-vekâle taleb ederim deyü da‘vâ ol dahi cevâbında fi’l-hakīka bağçe-i mezkûreyi müvekkil-i mûmâ-ileyhden beher sene yirmi iki guruş ücret tesmiyesiyle iki sene istîcâr eylediğini ve zimmetinde iki senelik kırk dört guruş deyni olduğunu ikrâr ve ziyâde bir sene istîcârını inkâr etmeğin müdde‘î-i vekîl-i mezbûr ber-vech-i muharrer ziyâde müdde‘âsını isbâta ba‘de’l-havâle mezbûr Hüseyin mertebe-i ikrârı olan kırk dört guruşu müvekkil-i mûmâ-ileyh için vekîl-i mezbûr Mustafa Efendi’ye edâsıyla mezbûr Hüseyin şer‘an ilzâm olunduğu bi’l-iltimâs huzûr-ı âlîlerine i‘lâm olundu. Fî-gurrei Ş sene 1204