Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 193 Hüküm no: 134 Orijinal metin no: [13a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yağlıkçı Seyyid Hacı Mustafa’nın kaybolan bir top bezinin Hacı Mehmed’de olduğu ve iadesi Ma‘rûz Mahmiye-i İslâmbol’da Duâ Meydanı’nda Yağlıkcı es-Seyyid el-Hâc Mustafa b. es-Seyyid Mehmed medîne-i Üsküdar’da mahfil-i bâbda meclis-i şer‘-i hatîrde zikri âtî bir top penbe-zâr beze vaz‘-ı yedi mütehakkık olan el-Hâc Mehmed b. İsmail mahzarında yedimde mülküm olup işbu meclis-i şer‘de mu‘âyene olunan otuz beş guruş kıymetli bir top penbe-zâr bezim târih-i i‘lâmdan on beş gün mukaddem yedimden zâyi‘ edip mezbûr el-Hâc Mehmed’in yedinde bulmamla bi’l-istihkāk taleb ederim deyü da‘vâ ol dahi cevâbında mezkûr beze vaz‘-ı yedini ikrâr lâkin gāib ani’l-meclis ismi ma‘lûmum olmayan bir zimmîden yirmi guruş semen-i medfû‘-ı makbûza iştirâ etmiş idim deyü müdde‘î-i mezbûrun mülkü olduğunu inkâr etmekle müdde‘î-i mezbûr ber-vech-i muharrer müdde‘âsını es-Seyyid Hasan b. Abdurrahman ve Molla Hasan b. Hüseyin nâm kimesneler şehâdetleriyle vech-i şer‘î üzere bi’l-muvâcehe ba‘de’l-isbât ve’l-half mûcebince zikr olunan bezi müdde‘î-i mezbûra teslîme mezbûr el-Hâc Mehmed’e tenbîh olunduğu bi’l-iltimâs huzûr-ı âlîlerine i‘lâm olundu. Fî 16 min-Şa‘bân sene 1204