Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 194 Hüküm no: 135 Orijinal metin no: [13a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nakkaş esnafından Seyyid Ahmed ve Seyyid Mehmed’in evini nakşettikleri bostancıbaşı yazıcısı Haseki İbrahim Ağa’da alacakları olduğu, bilir kişilerce inceleme yapıldığı, İbrahim Ağa’nın keşfe mani olup nakkaşlara küfrettiği Ma‘rûz Medîne-i Üsküdar’da nakkāş tâifesinden sâhib-i arzuhâl es-Seyyid Ahmed b. İsmail ve es-Seyyid Mehmed b. İbrahim nâm kimesneler bu esnâda izzetlü bostancıbaşı ağanın yazıcılık hizmetinde olan Haseki İbrahim Ağa’nın medîne-i mezbûrede Arakıyeci el-Hâc Mehmed mahallesinde vâki‘ bir bâb menzilini nakşedip yedi yüz elli guruş masrûfâtımızın üç yüz elli sekiz guruşunu ahz ve üç yüz doksan iki guruş hakkımız bâkī kalmış idi deyü da‘vâya tasaddî ve mezbûr Haseki İbrahim Ağa’nın ihzârı’çün çavuş mübâşeretiyle bi’d-defa‘ât da‘vet-i şer‘-i şerîf olundukda bir vechile itâ‘at etmeyip mürâfa‘adan imtinâ‘ ve masrûfâtlarında ihtilâf vâki‘ olup keşf ve mu‘âyeneye muhtâc olmağla sâdır olan fermân-ı âlîlerine imtisâlen kıbel-i şer‘den kuzâtdan Kâtib Mehmed Salih Efendi dâ‘îleri ve Hâssa mi‘mârı hulefâsından es-Seyyid Ahmed ve diğer Ahmed ve nakkāş ustalarından es-Seyyid el-Hâc Ali ve Süleyman ile menzil-i mezkûra varıp keşf ve mu‘âyene esnâsında mezbûr Haseki İbrahim Ağa keşifden dahi imtinâ‘ ve keşfettirmem diyerek müdde‘îlere şetm edip itâ‘at-i şer‘-i şerîf etmediğini mezbûr dâ‘îleri ve hulefâ ve ustalardan herbiri meclis-i şer‘a gelip alâ-vukū‘ihî ba‘de’l-inhâ mezbûr Haseki İbrahim Ağa’nın adem-i itâ‘ati ve meclis-i şer‘de şetmi ma‘lûm-ı devletleri buyuruldukda emr ü fermân hazret-i veliyyü’l-emrindir. Fî 17 min-Ş sene 1204