Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 195 Hüküm no: 137 Orijinal metin no: [13a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüdai Şeyh Mahmud Efendi Vakfı’ndan aldığı borcu kefilinin ödemesi Ma‘rûz Medîne-i Üsküdar’da vâki‘ kutbü’l-ârifîn merhûm Hüdâî es-Seyyid eş-Şeyh Mahmud Efendi vakfının kāimmakām-ı mütevellîsi Hafız Ali Efendi b. el-Hâc Mustafa medîne-i mezbûrede mahfil-i bâbda meclis-i şer‘-i hatîrde es-Seyyid eş-Şeyh Mehmed Safi Efendi b. es-Seyyid eş-Şeyh Mehmed mahzarında gāibetü ani’l-meclis Emine Hatun bt. Veliyüddin zimmetinde mâl-ı vakf-ı mezbûrdan bi’l-istiğlâl menzil üç yüz elli guruş ve menzil-i mezkûr ücretinden işbu târih-i i‘lâma gelince seksen beş buçuk guruşu zimmetinde müctemi‘ olup mezbûr es-Seyyid eş-Şeyh Mehmed Safi Efendi asıl mâl-ı mezkûr ile ücret-i mezkûreye bi’l-emr ve’l-kabûl kefîl ve dâmin olmağla kefâletine binâen mezkûr ücretinden müctemi‘a olan meblağ-ı merkūm seksen beş buçuk guruşu vakıf için taleb ederim deyü ba‘de’d-da‘vâ ve’l-istintâk ve’l-ikrâr mûcebiyle meblağ-ı merkūm seksen beş buçuk guruşun edâsıyla mezbûr es-Seyyid eş-Şeyh Mehmed Safi Efendi’ye şer‘an ilzâm olunduğu bi’l-iltimâs huzûr-ı âlîlerine i‘lâm olundu. Fî 12 min-Ş sene 1204