Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 214 Hüküm no: 178 Orijinal metin no: [16a-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Mehmed b. Ahmed’den aldığı un bedelinden borcu kalan Nikola’nın borcunu ödemesi Ma‘rûz Medîne-i Üsküdar’da Büyük İskele’de sâkin es-Seyyid Mehmed b. Ahmed nâm kimesne medîne-i mezbûrede mahfil-i bâbda meclis-i şer‘-i hatîrde Nikola v. Dimitri nâm zimmî muvâcehesinde merkūm Nikola zimmî târih-i i‘lâmdan beş ay mukaddem yedimden ve mâlımdan iştirâ ve kabz eylediği vezn ve fiyâtı beynimizde ma‘lûm dakīk-ı hâs semeninden üç yüz kırk guruş yirmi sekiz para hakkımın iki yüz kırk guruş on sekiz parasını yedinden ahz ve yüz guruş on para hakkım zimmetinde bâkī kalmağla hâlâ taleb ederim deyü da‘vâ ol dahi cevâbında ber-vech-i muharrer ikrâr lâkin kabzını mu‘terif olduğu meblağ-ı mezbûr iki yüz kırk guruş on sekiz paradan mâ‘adâ meblağ-ı mezbûr yüz guruş on parayı dahi kendiye edâ ve teslîm etmiş idim deyü ba‘de’d-def‘ ve’l-inkâr merkūm Nikola zimmî def‘-i mezkûrunu isbâta kādir olamayıp tahlîfe dahi tâlib olmamağla alâ-mûcebi ikrârihî meblağ-ı bâkī-i merkūm yüz guruş on paranın müdde‘î-i mezbûr es-Seyyid Mehmed’e edâsıyla merkūm Nikola zimmî şer‘an ilzâm olunduğu bi’l-iltimâs huzûr-ı âlîlerine i‘lâm olundu. Fî 2 min-Ş sene 1204