Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 214 Hüküm no: 177 Orijinal metin no: [16a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Abdullah’ın, Ayşe bt. Ahmed’e emanet bıraktığı mücevherlerini alması Ma‘rûz Medîne-i Üsküdar’da Aşcıbaşı mahallesinde sâkine ve zâtı mu‘arrefe Hadice bt. Abdullah nâm hatun medîne-i mezbûrede mahfil-i bâbda meclis-i şer‘-i hatîrde kezâlik zâtı mu‘arrefe olan Âişe bt. Ahmed nâm hatun mahzarında târih-i i‘lâmdan dört ay mukaddem mezbûre Âişe Hatun yedine bi-tarîki’l-emâne vaz‘ ve teslîm eylediğim emlâkimden iki buçuk miskāl inci ve bir elmaslı zümrüd ve bir çift altın kuşak ve bir çift altın bilezik ve yedi aded sagīr elmasımın a‘yânı hâlâ yedinde mevcûd iken bana teslîm etmemekle suâl olunup teslîme tenbîh olunmak matlûbumdur deyü da‘vâ ettikde ol dahi cevâbında ber-vech-i muharrer ikrâr ü i‘tirâf etmeğin mûcebiyle huliyy-i mezkûrun a‘yânını müdde‘iye-i mezbûreye teslîme mezbûre Âişe Hatun’a şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 4 min-Şevvâl sene 1204