Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 215 Hüküm no: 180 Orijinal metin no: [16b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmügülsüm bt. Ömer’e ait gömlek ve çevresini satan Dellâl Hafize’nin eşyaların bedelini ödemesi Ma‘rûz Medîne-i Üsküdar’da Tenbel el-Hâc Mehmed mahallesinde sâkine ve zâtı vech-i şer‘î üzere mu‘arrefe olan Ümmügülsüm bt. Ömer nâm hatun meclis-i şer‘-i hatîrde kezâlik zâtı mu‘arrefe Dellale Hafize bt. Osman nâm hatun mahzarında mezbûre Hafize Hatun târih-i i‘lâmdan üç ay mukaddem mecmû‘-ı kıymetleri yirmi dokuz buçuk guruşa bâliğ iki aded penbe-zâr gömlek ile bir çevremi âhara bey‘ için yedimden ahz ve âhara bey‘ edip meblağ-ı merkūm yirmi dokuz buçuk guruş hâlâ zimmetinde olmağla taleb ederim deyü ba‘de’d-da‘vâ ve’l-istintâk ve’l-ikrâr mûcebiyle meblağ-ı merkūm yirmi dokuz buçuk guruşun edâsıyla mezbûre Hafize Hatun şer‘an ilzâm olunduğu bi’l-iltimâs huzûr-ı âlîlerine i‘lâm olundu. Fî 26 min-N sene 1204