Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 216 Hüküm no: 181 Orijinal metin no: [16b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma bt. Mustafa’nın borcunu ödediğinden rehin bıraktığı eşyalarının geri verilmesi talebiyle açtığı davada sulh olduğu Ma‘rûz Medîne-i Üsküdar’da Hasanağa mahallesinde sâkine sâhibe-i arzuhâl mu‘arrefetü’z-zât Fatıma bt. Mustafa nâm hatun medîne-i mezbûrede mahfil-i bâbda meclis-i şer‘-i hatîrde arzuhâlde ismi mezkûr Hüseyin Efendi b. Mehmed nâm kimesne mahzarında târih-i i‘lâmdan on iki sene mukaddem mezbûr Hüseyin Efendi yedinden istikrâz ve kabz ve umûruma sarfla istihlâk eylediğim kırk beş guruş deynim mukābelesinde emlâkımdan doksan guruş kıymetli bir nohudî çiçekli çârşâl ve otuz üç guruş kıymetli bir yâkut taşlı yeşim kabzalı bıçağımı mezbûr Hüseyin Efendi yedine rehn vaz‘ ve teslîm etmemle hâlâ meblağ-ı merkūmu edâ ile sâlifü’z-zikr şal ve bıçağımı rehniyetden fek ile taleb ederim deyü da‘vâ ol dahi cevâbında zikr olunan şal ve bıçak târih-i merkūmda ber-vech-i muharrer kendi yedinde rehn olduğunu ikrâr lâkin bilâ-ta‘ad mahzenimden zâyi‘ olmuşdur deyü beynlerinde ba‘de vukū‘ı’l-münâza‘a beynlerine muslihûn tavassut edip müdde‘iye-i mezbûre eylediği da‘vâsından otuz guruş bedel-i makbûza mezbûr Hüseyin Efendi ile sulh olup zikr olunan şal ve bıçağın aynılarına ve ziyâde-i kıymetlerine müte‘allıka âmme-i de‘âvîden mezbûr Hüseyin Efendi’nin zimmetini ibrâ ve ıskāt eyledikde ol dahi târih-i mezbûrda medfû‘u olan meblağ-ı merkūm kırk beş guruşa ve beynlerinde ma‘lûm cihet-i deyn-i şer‘îden on beş guruşa müte‘allıka âmme-i de‘âvîden müdde‘iye-i mezbûrenin zimmetini ibrâ ve ıskāt ve herbiri ber-minvâl-i muharrer âharın ibrâsını kabûl edip bu vechile kat‘-ı münâza‘a eyledikleri mübâşiri es-Seyyid Mehmed Çavuş kulları iltimâsıyla huzûr-ı âlîlerine i‘lâm olundu. Fî 27 min-Ş sene 1204