Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 217 Hüküm no: 184 Orijinal metin no: [16b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Abdullah’ın, Hacı Ahmed tarafından evinden çalınan eşyalarını teslim aldığı Ma‘rûz Medîne-i Üsküdar’da Solaksinan mahallesinde sâkine ve zâtı mu‘arrefe Hadice bt. Abdullah nâm Zenciye meclis-i şer‘-i hatîrde kezâlik zâtı mu‘arrefe Havva bt. Hasan nâm hatun mahzarında mezbûre Havva Hatun’un zevci müteveffâ el-Hâc Ahmed nâm kimesne bundan akdem menzilime duhûl ve eşyâ-i memlûkemden işbu mu‘âyene olunan belekorina bir sagīr entari ve bir sagīr cebe ve bir şalî biniş ve bir sûzenî entari ve iki çuka perde ma‘a şerit ve bir şalî entari ve bir donluk lâhûr şal ve bir şalî entari ve bir sagīr yorgan yüzü ve bir şebekî? kahve örtüsü ve bir münakkaş havlu ve bir yağlık ve bir futa ve bir köhne iş makraması ve bir sandal-ı zâr ve bir polat tepsi ve bir perde astarını menzil-i mezkûrdan bi-gayrı hakkın fuzûlî ahz ü gasb edip hâlâ mezbûrenin yedinde bulmamla taleb ederim deyü da‘vâ ve mezbûre Havva Hatun cevâbında fi’l-hakīka eşyâ-i mezkûre müdde‘iye-i mezbûrenin mülkü olup zevci mezbûrun fuzûlî ahzını ikrâr ü i‘tirâf etmeğin eşyâ-i mezkûreyi meclis-i şer‘de müdde‘iye-i mezbûreye teslîm eyledikde ol dahi ahz ü kabz eylediği bi’l-iltimâs huzûr-ı âlîlerine i‘lâm olundu. Fî 14 min-L sene 1204