Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 218 Hüküm no: 185 Orijinal metin no: [16b-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Serkiz v. Asvador’un, kardeşi Bedros’a sattığı yarım bağ bedelinden kalan alacağının ödenmesi Ma‘rûz Medîne-i Üsküdar’da Yenimahalle’de mütemekkin Serkiz v. Asvador nâm zimmî medîne-i mezbûrede mahfil-i bâbda meclis-i şer‘-i hatîrde li-ebeveyn er karındaşı Bedros nâm zimmî muvâcehesinde merkūm Bedros zimmî târih-i i‘lâmdan sekiz sene mukaddem yedimden iştirâ ve kabz eylediği medîne-i mezbûreye tâbi‘ Bulgurlu karyesi bağları hilâlinde vâki‘ ma‘lûmü’l-hudûd nısf bağ semeninden dört yüz guruş hakkımın üç yüz guruşunu yedinden ahz ü kabz ve yüz guruşu zimmetinde bâkī kalmağla hâlâ taleb ederim deyü da‘vâ ol dahi cevâbında fi’l-hakīka müdde‘î-i merkūma cihet-i mezkûreden ancak seksen guruş deyni olduğunu ikrâr ziyâde yirmi guruşu inkâr etmeğin müdde‘î-i merkūm ziyâde müdde‘âsını ber-vech-i muharrer Mehmed b. Osman ve Süleyman Beşe b. Süleyman nâm kimesneler şehâdetleriyle muvâcehesinde isbât etmeğin mûcebiyle meblağ-ı merkūm yüz guruşu müdde‘î-i merkūma edâya merkūm Bedros zimmîye şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 24 min-Ş sene 1204