Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 218 Hüküm no: 186 Orijinal metin no: [17a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mehmed’in Dereseki köyündeki Çöpçü Camii ve Mektebi vakıflarına olan borcunun terekesinden ödenmesi Ma‘rûz Medîne-i Üsküdar’a muzâfe Yoros nâhiyesine tâbi‘ Dereseki karyesinde vâki‘ Çöpçü Câmi‘-i şerîfi vakfının hâlâ mütevellîsi Ömer b. Mustafa ve mekteb-i şerîf vakfının mütevellîsi es-Seyyid Mustafa b. Ali nâm kimesneler Çarşamba günü dîvân-ı âlîde ba‘dehû Üsküdar mahkemesinde meclis-i şer‘-i hatîrde zâtı mu‘arrefe sâhibe-i arzuhâl Fatıma bt. Mehmed nâm hatun mahzarında mezbûre Fatıma Hatun’un babası mezbûr Mehmed sâlifü’z-zikr câmi‘-i şerîf vakfı mâlından altmış beş guruş ve mekteb-i şerîf vakfı mâlından otuz dört guruş ki cem‘an doksan dokuz guruş vakfeyn-i mezkûreyne karz-ı şer‘îden deyni olup kable’l-edâ vefât etmekle tereke-i vâfiyesinden taleb eylediğimizde kızı mezbûre Fatıma Hatun deyn-i mezkûru kabûl ve edâya ta‘ahhüd ve yedimize iki kıt‘a temessük dahi i‘tâ edip hâlâ zimmetinde olmağla taleb ederiz deyü da‘vâ ve mezbûre Fatıma Hatun cevâbında fi’l-hakīka babası müteveffâ-yı mezbûrun vakfeyn-i mezkûreyne ol-mikdâr deynini ve edâya ta‘ahhüdünü ikrâr lâkin deyn-i mezkûr için vakfeyn-i mezkûreyn mütevellîlerine yüz altmış guruş vermiş idim deyü eylediği def‘ini isbât esnâsında beynlerine muslihûn tavassut edip mütevellî-i mezbûr Ömer nef‘an li’l-vakf müdde‘âsı olan altmış beş guruşun yirmi guruşunu ve es-Seyyid Mustafa kezâlik müdde‘âsı olan otuz dört guruşun dört guruşunu bi-tarîki’s-sulh hatt ü tenzîl ve bâkī kalan yetmiş beş guruşu dahi târih-i kitâbdan altı ay tamamında edâ etmek üzere mezbûre Fatıma Hatun’u bi’t-taleb tecîl eylediklerinde ol dahi ecel-i merkūm hulûlünde meblağ-ı bâkī-i merkūm yetmiş beş guruşu edâya ta‘ahhüd ve hâzıratü bi’l-meclis mu‘arrefetü’z-zât Giridî Rukiye bt. Mustafa nâm hatun dahi deyn-i mezkûra bi’l-emr ve’l-kabûl kefîl ve dâmin olup bu vechile kat‘-ı münâza‘a eyledikleri mübâşiri çavuş kulları iltimâsıyla huzûr-ı âlîlerine i‘lâm olundu. Fî 11 min-L sene 1204