Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 222 Hüküm no: 193 Orijinal metin no: [17b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bostancılar İsmail ve kardeşi Mustafa tarafından bıçaklandıktan sonra ölen Kalyoncu Ahmed’in muayenesinin yapılarak defnine izin verildiği Ma‘rûz Bi’l-iltimâs kıbel-i şer‘-i şerîfden meb‘ûs Salih Efendi dâ‘îleri Medîne-i Üsküdar’da Arakıyeci el-Hâc Mehmed mahallesinde sâkin iken mecrûhan fevt olan Kalyoncu Ahmed b. Ahmed’in menziline varıp mazbûtü’l-esâmî Müslimîn huzûrlarında akd-i meclis-i şer‘-i âlî ettikde müteveffâ-yı mezbûrun veresesinden zâtları mu‘arrefe vâlidesi Âişe ve zevcesi Hadice ve kız karındaşı diğer Âişe’den herbiri meclis-i ma‘kūd-ı mezkûrda bast-ı kelâm edip mûrisimiz müteveffâ-yı mezbûr târih-i i‘lâmdan altmış yedi gün mukaddem medîne-i mezbûrede Başbakkal demekle meşhûr dükkân önünde tarîk-ı âmda vakt-i ışâda menziline gelir iken gāibân ani’l-meclis Bıçakcı Bostanî İsmail ve karındaşı Bostanî Mustafa nâm kimesnelerden herbiri müteveffâ-yı mezbûru bi’l-ma‘iye ahz ve kebîr Çerkez bıçağı ile bi-gayrı hakkın amden sol tarafının şah damarı üzerinden ve sol gözü üzerinden ve ensesinden ve depesinden ve sol kaba altı üzerinden ve kuyruk sokumu üzerinden cem‘an altı yerinden darb ve cerh etmeleriyle altmış yedi gün mürûrunda cerâhat-ı mezkûreden müte’essiren fevt olmağla kıbel-i şer‘den keşf ve mu‘âyene olunmak matlûbumdur dediklerinde hâzırûn bi’l-meclis olan cemâ‘at-i Müslimîn ile müteveffâ-yı mezbûrun a‘zâsına nazar olundukda fi’l-hakīka müteveffâ-yı mezbûr Kalyoncu Ahmed sol tarafının şah damarı üzerinden ve sol gözü üzerinden ve ensesinden ve depesinden ve sol kaba eti üzerinden ve kuyruk sokumu üzerinden cem‘an altı yerinden bıçak yarası ile mecrûhan fevt olduğu ba‘de’l-keşf ve’l-mu‘âyene defnine izin birle vâki‘ hâli mezbûr dâ‘îleri mahâllinde ba‘de’t-tahrîr ve’l-inhâ huzûr-ı âlîlerine i‘lâm olundu. Fî 17 min-L sene 1204