Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 221 Hüküm no: 192 Orijinal metin no: [17b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haffaf esnafından olup mahalle aralarında eşkıyalık yapan ve adam yaralayan Yemenici Seyyid Ali’nin Üsküdar’dan ihraç edilmesi talepleri Ma‘rûz Medîne-i Üsküdar’da haffâf esnâfından kethudâları es-Seyyid Mehmed Ağa b. İbrahim ve Mustafa Ağa b. Ömer ve Mehmed Emin b. Kasım ve el-Hâc Hüseyin b. el-Hâc Mehmed ve Hafız Mustafa b. Musa ve es-Seyyid Mehmed Emin b. Mustafa ve Mehmed Ağa b. Abdullah ve Molla Salih b. Mehmed ve İbrahim Efendi b. İsmail ve Molla Hüseyin b. Mehmed ve İsmail Ağa b. Abdullah ve el-Hâc Ali b. Mustafa nâm kimesneler medîne-i mezbûrede mahfil-i bâbda meclis-i şer‘-i hatîrde Yemenici es-Seyyid Ali b. Abdurrahman nâm kimesne mahzarında mezbûr es-Seyyid Ali kendi hâlinde ırzıyla mukayyed olmayıp eşkıyâ zümresinden olup gecelerde gâh bostânî ve gâh kalyoncu gezip medîne-i mezbûrede mahallât aralarında müsellah geşt ü güzâr edip cümlemizi ta‘cîz ve tekdîr eylediğinden mâ‘adâ târih-i i‘lâm gecesi esnâf-ı mezkûreden hâzırân bi’l-meclis el-Hâc Halil [ve] Mehmed Emin nâm kimesnenin [kimesnelerin] önlerine gelip katl kasdıyla üzerlerine bıçak ile hücûm ve itâle-i lisân ile şetm ve ırzlarını hetk edip gavga esnâsında medîne-i mezbûrede Ayazma ustası bölükbaşısı neferâtı ile üzerine varıp mezbûrânı tahlîs ve mezbûr es-Seyyid Ali’yi ahz eylediklerinden gayri yine târih-i i‘lâmdan üç gece mukaddem medîne-i mezbûrede kolluk karşısında vâki‘ işbu hâzır bi’l-meclis Kahveci İsmail Ağa’nın menziline gelip piştov sıkıp ve depme ile darb ve hetk-i ırz etmekle mezbûr es-Seyyid Ali’ye bi’d-defa‘ât nush ü pend eylediğimizde mütenassıh olmayıp ef‘âl-i şenî‘asında ısrâr ve mezbûr Ali’den bi’l-külliye emniyetimiz meslûb olmuşdur deyü mezbûr es-Seyyid Ali’in sû’-i hâlini muvâcehesinde herbiri ihbâr ve fîmâ-ba‘d mezbûr es-Seyyid Ali Üsküdar ve hâvîsinde meks ve ikāmet etmeyip medîne-i mezbûreden ihrâc olunmak bâbında fermân-ı âlîleri sudûrunu herbiri istid‘â ve istirhâm eyledikleri bi’l-iltimâs huzûr-ı âlîlerine i‘lâm olundu. Fî 21 min-L sene 1204