Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 223 Hüküm no: 195 Orijinal metin no: [17b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva bt. Salih’in boşandığı kocası Mehmed ile kayınpederi Hasan’a açtığı alacak davasında sulh olduğu Ma‘rûz Sâhibe-i arzuhâl mu‘arrefetü’z-zât Havva bt. Salih nâm hatun medîne-i Üsküdar’da mahfil-i bâbda meclis-i şer‘-i hatîrde derûn-ı arzuhâlde isimleri mezkûr zevc-i mutallıkı Mehmed ile kayınpederi Hasan b. Bekir nâm kimesneler mahzarlarında târih-i i‘lâmdan altı ay mukaddem mezbûr Mehmed ile beynimizde zevciyet kāime iken mezbûrân Mehmed ve Hasan yedimden münâsafaten istidâne ve kabz ve umûrlarına sarfla istihlâk eyledikleri cihet-i karz-ı şer‘îden yüz kırk guruş zimmetlerinde hakkım olmağla taleb ederim deyü eylediği da‘vâsından bâ-tavassut-ı muslihîn mezbûrân Mehmed ve Hasan ile seksen guruş bedel mukābelesinde sulh olup ziyâde müdde‘âsı olan yetmiş guruşa ve bi’l-cümle husûs-ı mezkûra müte‘allika âmme-i de‘âvîden mezbûrân Mehmed ve Hasan’ın zimmetlerini ibrâ ve ıskāt onlar dahi ber-minvâl-i muharrer ibrâsını ba‘de’l-kabûl bedel-i sulh-ı merkūm seksen guruşu beher şehr tamamında onar guruşdan cem‘an sekiz ay tamamında edâ etmek üzere bi’r-rızâ imhâl eyledikde anlar dahi ber-vech-i muharrer müddet-i mehl tamamında herbiri edâya müte‘ahhid ve bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 16 min-Şevvâl sene 1204