Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 224 Hüküm no: 196 Orijinal metin no: [17b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Said’in Ataullah Bey’e ait Selanik’ten İstanbul’a getirdiği iki at ile kendisinin ve hizmetçisinin yol masraflarının ödenmesi için açtığı davada sulh olduğu Ma‘rûz Mahmiye-i İslâmbol’da Kovacılar Hamamı kurbünde sâkin Mehmed Said b. Mehmed Emin medîne-i Üsküdar’da mahfil-i bâbda meclis-i şer‘-i hatîrde Ataullah Bey b. Ahmed tarafından ber-vech-i âtî vekîl olduğu Hasan Bey b. Ahmed ve İsmail b. Hasan nâm kimesneler şehâdetleriyle sâbit olan es-Seyyid Ali b. Mehmed mahzarında ben müvekkil-i mezbûrun etbâ‘ından olup târih-i i‘lâmdan iki ay mukaddem Mahrûse-i Selanik’den Âsitâne’ye irsâl ve îsâl için bana def‘ ü teslîm eylediği iki re’s atının esnâ-i tarîkde Âsitâne’ye gelince arpa ve saman ve ma‘an irsâl eylediği bir re’s hizmetkârının mekûlât ve meşrûbât mesârifları’çün müvekkil-i mezbûrun bi-şarti’r-rücû‘ emriyle mâlımdan harc ve sarf eylediğim elli üç guruş hakkımı bi’l-mürâca‘a taleb ederim deyü eylediği da‘vâsından bâ-tavassut-ı muslihîn on beş guruş bedel-i makbûz mukābelesinde vekîl-i mezbûr ile sulh olup ziyâde müdde‘âsı olan otuz sekiz guruşa müte‘allıka âmme-i de‘âvîden müvekkil-i mezbûr Ataullah Bey’in zimmetini ba‘de’l-ibrâ ve’l-kabûl kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 13 min-L sene 1204