Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 231 Hüküm no: 209 Orijinal metin no: [19a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Ahmed’in, bir ferağ muamelesi yapmak üzere Pervane Mehmed Ağa Vakfı cabisi Seyyid Bekir’e verdiği paranın muamelenin yapılmadığından iadesi talebiyle açtığı davada haksız bulunduğu Ma‘rûz Medîne-i Üsküdar’da Aşcıbaşı mahallesinde sâkin Ahmed b. Ahmed medîne-i Üsküdar’da mahfil-i bâbda meclis-i şer‘-i hatîrde es-Seyyid Bekir b. es-Seyyid Halil mahzarında mezbûr es-Seyyid Bekir Pervâne Mehmed Ağa Vakfı’nın câbîsi olup târih-i i‘lâmdan iki sene mukaddem mahalle-i mezbûrede vâki‘ vakf-ı mezbûr musakkafâtından olup ma‘lûmü’l-hudûd ve’l-müştemilât bir bâb menzil karındaşımın tasarrufunda iken vâlideme ferâgati için mezbûr es-Seyyid Bekir’e harc-ı ferâğ olmak üzere yedi guruş teslîm ol dahi yedimden ba‘de’l-ahz vâlidemin üzerine ferâğı tahrîr ettirmeyip meblağ-ı mezbûr zimmetinde kalmağla hâlâ taleb ederim deyü da‘vâ ve mezbûr es-Seyyid Bekir cevâbında müdde‘î-i mezbûrdan ber-vech-i muharrer yedi guruş ahzını ikrâr lâkin menzil-i mezkûr vâlidesi üzerine ferâğı tahrîr olunduğundan mâ‘adâ meblağ-ı mezbûrdan benim zimmetimi dahi ibrâ etmiş idi deyü ba‘de’d-def‘ ve’l-inkâr mezbûr es-Seyyid Bekir eylediği def‘ini Hafız el-Hâc Mehmed Efendi b. el-Hâc Abdullah ve es-Seyyid Yakub b. es-Seyyid Mehmed nâm kimesneler şehâdetleriyle vech-i şer‘î üzere muvâcehesinde isbât etmeğin mûcebiyle müdde‘î-i mezbûr husûs-ı mezkûrda mezbûr es-Seyyid Bekir’e bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 10 min-L sene 1204