Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 234 Hüküm no: 215 Orijinal metin no: [19b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Davudpaşa mahallesi avarız vakfına borcu olan Mehmed Salih’in borcunu ödemesi Medîne-i Üsküdar’da Davudpaşa mahallesi bedel-i avârızı vakfının mütevellîsi Osman Ağa b. Hüseyin nâm kimesne medîne-i mezbûrede mahfil-i bâbda meclis-i şer‘-i hatîrde Mehmed Salih b. Mehmed Sadık nâm kimesne mahzarında mezbûr Mehmed Salih târih-i i‘lâmdan yedi ay mukaddem mâl-ı vakf-ı mezbûrdan olmak üzere yedimden istidâne ve kabz eylediği cihet-i karzdan doksan sekiz guruş zimmetinde mâl-ı vakf-ı mezbûra deyni olup hattâ târih-i i‘lâm günü huzûr-ı Müslimînde ikrâr dahi etmekle meblağ-ı merkūm doksan sekiz guruşu vakf-ı mezbûr için bi’t-tevliye hâlâ taleb ederim deyü ba‘de’d-da‘vâ ve’l-istintâk ve’l-inkâr müdde‘î-i mütevellî-i mezbûr Mehmed Salih’in ber-vech-i muharrer ikrâr-ı meşrûhunu lede’t-tezkiye adâletleri zâhir olan Mehmed Emin [b.] İbrahim ve Ebûbekir b. Mehmed nâm kimesneler şehâdetleriyle vech-i şer‘î üzere muvâcehesinde isbât etmeğin mûcebiyle meblağ-ı merkūm doksan sekiz guruşu vakıf için mütevellî-i mezbûra edâ ve teslîme mezbûr Mehmed Salih’e şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 21 min-Receb sene 1204