Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 235 Hüküm no: 216 Orijinal metin no: [19b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üsküdar’da Hüdai Şeyh Mahmud Efendi Dergâhı Postnişini Şeyh Mehmed Ruşen Efendi’ye küfür ve hakaretler eden Havva bt. Abdullah’ın cezalandırılması Nukilet Nukilet Nukilet İşbu i‘lâmda galat vâki‘ olmağla darb olunup tashîhi kâğıdın zahrında mastûr ve mukayyeddir. Ma‘rûz Medîne-i Üsküdar’da vâki‘ kutbü’l-ârifîn gavsü’l-vâsılîn merhûm es-Seyyid eş-Şeyh Mahmud Efendi -kuddise sırruhû- hazretlerinin Âsitâne-i aliyyelerinde seccâde-nişîn-i irşâd olan eş-Şeyh Mehmed Rûşen Efendi bin el-merhûm eş-Şeyh Abdurrahman Efendi taraflarından vech-i âtî üzere vekîl olduğu es-Seyyid Molla Emrullah b. Veli ve es-Seyyid Molla Mehmed b. Süleyman nâm kimesneler şehâdetleriyle sâbit olan Mehmed Efendi b. Ali nâm kimesne medîne-i mezbûrede mahfil-i bâbda meclis-i şer‘-i hatîrde mu‘arrefetü’z-zât Havva bt. Abdullah nâm hatun mahzarında mezbûre Havva târih-i i‘lâm günü müvekkilim mûmâ-ileyhin menzili önüne gelip menzilini taşladığından mâ‘adâ kâfir ve cühûd deyü şütûm-ı galîza ile muvâcehesinde şetm ve bu vechile hetk-i ırz etmekle mûcib-i şer‘îsini mezbûre Havva’dan bi’l-vekâle taleb ederim deyü ba‘de’d-da‘vâ ve’l-istintâk ve’l-inkâr vekîl-i mezbûr ber-vech-i muharrer müdde‘âsını udûlden Hafız Ali Efendi b. el-Hâc Mustafa ve el-Hâc Ahmed b. Veli nâm kimesneler şehâdetleriyle vech-i şer‘î üzere muvâcehesinde isbât etmeğin mûcebiyle mezbûre Havva Hatun’a şer‘an ta‘zîr lâzım geldiği tescîl ve bi’l-iltimâs huzûr-ı âlîlerine i‘lâm olundu. Fî 2 min-Zilka‘de sene 1204