Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 240 Hüküm no: 227 Orijinal metin no: [20a-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdulkadir b. Salih’in, Hasan b. Memiş’e açtığı diş diyeti davasında sulh oldukları Ma‘rûz Medîne-i Üsküdar’a tâbi‘ Dudullu karyesinde sâkin Abdulkadir b. Salih nâm kimesne medîne-i mezbûrede mahfil-i bâbda meclis-i şer‘-i hatîrde Hasan b. Memiş nâm kimesne muvâcehesinde mezbûr Hasan târih-i i‘lâmdan bir gün mukaddem kable’l-mağrib karye-i mezbûrede bi-gayrı hakkın taş ile ağzıma darb ve hânek-i a‘lâ ve esfelimden seniyye ve rubâiyye? ta‘bîr olunur dört aded dişimin birini ihrâc ve birini kesr ve ikisini tahrîk etmekle mûcib-i şer‘îsini hâlen taleb ederim deyü tasaddî eylediği da‘vâsından bâ-tavassut-ı muslihîn altmış üç guruş bedel-i makbûza mezbûr Hasan ile sulh olup esnân-ı mezkûreye ve diyetlerine ve bi’l-cümle husûs-ı mezkûra müte‘allika âmme-i de‘âvîden mezbûr Hasan’ın zimmetini ba‘de’l-ibrâ ve’l-kabûl bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî-selhi L sene 1204