Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 241 Hüküm no: 228 Orijinal metin no: [20b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. İbrahim’in borcunu ödemesi Ma‘rûz Fi’l-asıl Vilâyet-i Anadolu’da Tosya kazâsı ahâlisinden olup medîne-i Üsküdar’da misâfiren sâkin Süleyman b. Mustafa nâm kimesne medîne-i mezbûrede mahfil-i bâbda meclis-i şer‘-i hatîrde Mehmed b. İbrahim nâm kimesne mahzarında mezbûr Mehmed târih-i i‘lâmdan üç sene mukaddem karındaşım gāib ani’l-beled Ahmed nâm kimesne için cihet-i karzdan on üç guruş zimmetinde hakkım olmağla bana on üç guruş ver gāib-i mezbûr zimmetinde olan meblağ-ı mezbûr on üç guruş senin olsun gāib-i mezbûr Ahmed sana meblağ-ı mezbûru vermez ise meblağ-ı mezbûr on üç guruşu benden al deyüp ben dahi binâen-aleyh on üç guruşu mezbûr Mehmed’e def‘ ü teslîm eylediğimde ol dahi yedimden ba‘de’l-ahz ve’l-kabz ba‘dehû gāib-i mezbûra i‘lâm eylediğimde râzı olmayıp meblağ-ı mezbûr on üç guruşu bana vermemekle medfû‘um olan meblağ-ı mezbûru mezbûr Mehmed’den hâlâ taleb ederim deyü da‘vâ mezbûr Mehmed cevâbında târih-i merkūmede meblağ-ı mezbûr on üç guruşu ahzını ikrâr lâkin benden al dediğini inkâr etmeğin müdde‘î-i mezbûr ber-vech-i muharrer müdde‘âsını Hasan b. Hasan ve Hüseyin bin Osman nâm kimesneler şehâdetleriyle muvâcehesinde vech-i şer‘î üzere isbât etmeğin mûcebince meblağ-ı mezbûr on üç guruşu müdde‘î-i mezbûra edâ ve teslîme mezbûr Mehmed’e tenbîh olunduğu bi’l-iltimâs huzûr-ı âlîlerine i‘lâm olundu. Fî 25 min-L sene 1204