Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 250 Hüküm no: 246 Orijinal metin no: [22a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kantarzade Mehmed Emin Ağa bağında kurşunlanarak katledilen Hizmetçi Zenci Ali’nin muayenesinin yapılarak defnine izin verildiği Ma‘rûz Sâdır olan fermân-ı âlîlerine imtisâlen kıbel-i şer‘den meb‘ûs kuzâtdan Kâtib es-Seyyid Abdurrahman Efendi dâ‘îleri ve izzetlü bostancıbaşı ağa tarafından müte‘ayyin Çukadâr Mehmed Emin ve Estoros karyesi ustası ve sâir mazbûtü’l-esâmî Müslimîn ile medîne-i Üsküdar hâricinde Abdullah Ağa toprağında vâki‘ kireçhâne kurbünde kâin Kantarîzâde Mehmed Emin Ağa’nın bağına varıp huzûr-ı Müslimînde akd-i meclis-i şer‘-i şerîf ettikde mezbûr Mehmed Emin Ağa meclis-i ma‘kūd-ı mezkûrda bast-ı kelâm edip târih-i i‘lâm gecesi işbu derûnunda akd-i meclis-i şer‘ olunan bağ-ı mezkûrda Zenci Ali b. Abdullah nâm gulâmımı ismi ma‘lûm olmayan kimesne tüfenk kurşunu ile sol omuzu başından darb ve mecrûhan fevt olmağla kıbel-i şer‘den keşf ve mu‘âyene olunmak matlûbumdur dedikde mezbûr Ali’nin a‘zâsına nazar eylediklerinde fi’l-hakīka sol omuzu başından kurşun yarasıyla mecrûhan fevt olduğunu ba‘de’l-keşf ve’l-mu‘âyene defnine izin birle vâki‘ hâli mevlana-yı mezbûr mahâllinde ketb ü tahrîr ba‘dehû ümenâ-i şer‘le meclis-i şer‘-i şerîfe gelip inhâ eylediği mübâşir-i merkūm iltimâsıyla huzûr-ı âlîlerine i‘lâm olundu. Fî 19 min-Za sene 1204