Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 259 Hüküm no: 265 Orijinal metin no: [23b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üsküdar’ın Hasanağa mahallesi ahalilerinin, uygunsuz ve ahlaksız tavırlarından dolayı Hatice bt. Abdullah’ın mahallelerinden ihraç edilmesi talepleri Ma‘rûz Medîne-i Üsküdar’da Hasanağa mahallesi imâmı el-Hâc Ahmed Efendi b. el-Hâc Mustafa ve Müezzin Molla Mustafa b. İsmail ve ahâlisinden Hüseyin b. Mehmed ve es-Seyyid Cemaleddin Efendi b. Lütfullah ve es-Seyyid eş-Şeyh Mehmed Gālib Efendi b. es-Seyyid Mehmed ve es-Seyyid Mustafa Efendi b. İsmail ve Ahmed Ağa b. Mehmed ve Mustafa Efendi b. Ali ve Mustafa Ağa b. Mehmed ve İbrahim b. Veli ve es-Seyyid Abdurrahman b. Abdullah ve Kahveci İbrahim b. İbrahim ve Mustafa Ağa b. Ömer ve diğer Feyzullah Efendi b. Abdullah ve Mustafa b. İbrahim ve es-Seyyid Mehmed Safi Efendi b. es-Seyyid Mehmed ve Ömer Beşe b. Ahmed ve el-Hâc Ali b. Ahmed nâm kimesneler medîne-i mezbûrede mahfil-i bâbda meclis-i şer‘-i hatîrde herbiri takrîr-i kelâm ve bast-ı merâm edip mukaddemâ Galata sâkinelerinden olup hâlâ mahalle-i mezbûrede sâkine Demirci zevcesi demekle meşhûre Hadice bt. Abdullah nâm hatun kendi hâlinde olmayıp dil-âzâr ve hadîdü’l-lisân ve bî-edeb olup nâ-mahremden dahi ictinâbı olmadığından mâ‘adâ mahalle-i mezbûrede müte‘addid menâzil binâ ve mechûlü’l-ahvâl ricâl ve nisvâna îcâr ve men‘ irâdesinde olanları şütûm-ı galîza ile şetm ve cemî‘ menhiyâtı mürtekib olmağla mezbûre Hadice’ye bi’d-defa‘ât nush ü pend eylediğimizde mütenassıha olmayıp ef‘âl-i kabîhasında ısrâr ve mezbûre Hadice’den bi’l-külliye emniyetimiz meslûb olmağla mezbûrenin ef‘âl-i kabîhasını meclis-i şer‘a ihbâr ve şer ve mazarratını üzerimizden def‘ için mahalle-i mezbûreden ihrâc murâdıyla meclis-i şer‘a ihzâr ve muvâcehesinde ihbâr esnâsında mezbûre Hadice meclis-i şer‘den firâr etmişdir deyü ber-minvâl-i muharrer mezbûrenin sû’-i hâlini herbiri ihbâr ve mahalle-i mezbûreden ihrâc buyurulmak bâbında fermân-ı âlîleri sudûrunu istirhâm eyledikleri bi’l-iltimâs huzûr-ı âlîlerine i‘lâm olundu. Fî-gurrei Zilhicce sene 1204