Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 260 Hüküm no: 266 Orijinal metin no: [23b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Ahmed’in hizmet bedelinden alacağı kaldığı iddiasıyla Mühürdar Ahmed Ağa’ya açtığı davayı ispat edemediği Ma‘rûz Mahmiye-i İslâmbol’da Yerebatan Sarayı’nda sâkin sâhib-i arzuhâl el-Hâc Ahmed b. Amir nâm kimesne medîne-i Üsküdar’da mahfil-i bâbda meclis-i şer‘-i hatîrde arzuhâlde ismi mezkûr Mühürdâr Ahmed Ağa b. Mustafa nâm kimesne mahzarında ben mezbûr Ahmed Ağa’ya bundan akdem beher şehr dörder guruş ve beher sene otuz guruş ücret kavliyle sekiz ay hizmet edip şühûr-ı mezkûrede müctemi‘a olan otuz iki guruş ile yıllık-ı mezkûrdan sekiz aya isâbet eden yirmi guruş ki cem‘an elli iki guruşun yirmi guruşunu yedinden ahz ü kabz edip mâ‘adâsı olan otuz iki guruş zimmetinde bâkī kalmağla taleb ederim deyü da‘vâ ve mezbûr Ahmed Ağa cevâbında müdde‘î-i mezbûr el-Hâc Ahmed beher şehr dörder guruş ücret kavliyle ancak beş ay kendiye hizmet edip ücreti olan yirmi guruşu yedine tamamen teslîm edip hattâ kabzını mu‘terif dahi olmuş idi deyü ziyâde üç ay hizmetini ve yıllık ücretini inkâr etmeğin müdde‘î-i mezbûr el-Hâc Ahmed ziyâde müdde‘âsını isbâta kādir olamayıp talebiyle mezbûr Ahmed Ağa gıbbe’t-tahlîfi’ş-şer‘î mûcebiyle müdde‘î-i mezbûr el-Hâc Ahmed da‘vâ-yı mezkûresiyle mezbûr Ahmed Ağa’ya bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 23 min-Za sene 1204