Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 263 Hüküm no: 271 Orijinal metin no: [24a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Abdulkadir ve oğluna ait evin ifrazının yapılıp hisselerinin paylaşımına karar verildiği Ma‘rûz Medîne-i Üsküdar’a muzâfe Beykoz kasabasında sâkine ve zâtı ta‘rîf-i şer‘î ile mu‘arrefe sâhibe-i arzuhâl Âişe bt. Abdulkadir nâm hatun Çarşamba günü Dîvân-ı âlî’de ba‘dehû Üsküdar mahkemesinde meclis-i şer‘-i hatîrde zikri âtî menzile vâzı‘atü’l-yed olan Safiye nâm Hatun’un babası ve tarafından ber-vech-i âtî vekîl olduğu zâtını ârifân Hafız Mustafa b. Mustafa ve el-Hâc Mustafa b. Mehmed nâm kimesneler şehâdetleriyle sâbit olan el-Hâc İbrahim Ağa b. Mehmed mahzarında kasaba-i mezbûrede vâki‘ etrâf-ı erba‘ası İhtisâb Ağası ve Vartalı veresesi mülkleri ve leb-i deryâ ve tarîk-ı âm ile mahdûd ma‘lûmü’l-müştemilât bir bâb mülk menzil yedi yüz altmış sekiz sehm i‘tibârıyla beş yüz doksan üç sehmi benim ve yüz yetmiş beş sehmi hâzır bi’l-meclis oğlum Abdulkadir’in yedimizde mülkümüz iken bundan akdem oğlum mezbûr sâkin olmak için menzil-i mezkûrun bir mikdâr mahâllini tahta perde ile ifrâz ve oğlum mezbûr dahi sâkin iken fuzûlî müvekkile-i mezbûreye bey‘ edip henüz hissesi’çün ta‘yîn ve tahsîs olunmayıp ve hisse-i mezkûresinden dahi ezyed olmağla menzil-i mezkûrdan keff-i yed ve mi‘mâr ağa ve sâir ehl-i vukūf ma‘rifetleriyle taksîm olunmak matlûbumdur deyü da‘vâ ve vekîl-i mezbûr cevâbında fi’l-hakīka menzil-i mezkûr müdde‘iye-i mezbûre ile oğlu mezbûrun şâyi‘an yedlerinde mülkleri iken beş sene mukaddem müdde‘iye-i mezbûre menzil-i mezkûrdan ifrâz olunan mahâlli hüsn-i rızâsıyla oğlu mezbûrun yüz yetmiş beş sehm hissesi’çün ta‘yîn ve tahsîs edip teslîm etmekle ol dahi kendi mâlıyla ifrâz olunan bir matbah binâ ve bir sene mukaddem yedi yüz elli guruş semen-i makbûza kızım müvekkile-i mezbûreye bâ-hüccet-i şer‘iye bey‘ ve temlik etmiş idi deyü vekîl-i mezbûr eylediği def‘ini isbâta kādir olamayıp talebiyle müdde‘iye-i mezbûre Âişe Hatun gıbbe’t-tahlîfi’ş-şer‘î mûcebiyle menzil-i mezkûrun ifrâz olunan müvekkile-i mezbûra istiğlâl da‘vâsıyla mu‘ârazadan ba‘de’l-men‘ menzil-i mezkûr mi‘mâr ağa ve erbâb-ı vukūf ma‘rifetleriyle taksîm ve hisseleri ifrâz olunmak üzere tarafeyn râzılar oldukları mübâşiri kapı kethudâsı kulları iltimâsıyla huzûr-ı âlîlerine i‘lâm olundu. Fî-gurrei Zilhicce sene 1204