Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 262 Hüküm no: 270 Orijinal metin no: [24a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye bt. Mehmed’in, alacak iddiasıyla Ayşe bt. Mehmed’e açtığı davayı ispat edemediği Ma‘rûz Medîne-i Üsküdar’da Bulgurlu mahallesinde sâkine mu‘arrefetü’z-zât Rukiye bt. Mehmed nâm hatun medîne-i mezbûrede mahfil-i bâbda meclis-i şer‘-i hatîrde kezâlik zâtı mu‘arrefe Âişe bt. Mehmed nâm hatun muvâcehesinde mezbûre Âişe Hatun târih-i i‘lâmdan bir ay mukaddem yedimden ve mâlımdan bi-tarîki’l-karz istidâne va kabz eylediği yüz guruş ve bir Mushaf-ı şerîf semeninden yirmi altı guruş on para ki cem‘an yüz yirmi altı guruş on para hakkımın yüz guruşunu yedinden ahz ü kabz edip bâkī yirmi altı guruş on para zimmetinde kalmağla meblağ-ı bâkī-i merkūmu mezbûre Âişe’den hâlâ taleb ederim deyü ba‘de’d-da‘vâ ve’l-istintâk ve’l-inkâr müdde‘iye-i mezbûre ber-vech-i muharrer müdde‘âsını isbâtdan ızhâr-ı acz edip talebiyle mezbûre Âişe Hatun gıbbe’t-tahlîfi’ş-şer‘î mûcebiyle müdde‘iye-i mezbûre Rukiye Hatun da‘vâ-yı mezkûresiyle mezbûre Âişe Hatun’a bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 25 min-Za sene 1204