Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 264 Hüküm no: 273 Orijinal metin no: [24a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kosta v. Ohannes’e borcu olan Bekzada bt. Kirkor’un borca karşılık rehin verdiği âletlerini rehniyetten kurtarması Ma‘rûz Mahrûse-i Galata’da Beyoğlu nâm mahâlde mütemekkin Kosta v. Ohannes nâm zimmî medîne-i Üsküdar’da mahfil-i bâbda meclis-i şer‘-i hatîrde şahsı mu‘arrefe Bekzada bt. Kirkor nâm Nasrâniye muvâcehesinde merkūme Bekzada Nasrâniye târih-i i‘lâmdan on dört ay mukaddem yedimden istidâne ve kabz ve kendi umûruna sarfla istihlâk eylediği cihet-i karzdan yüz altmış guruş deyni mukābelesinde medîne-i mezbûrede Arasta kurbünde kâin câmeşûyî dükkânı derûnunda mevcûd beyne’l-hıref gedik ta‘bîr olunur ber-mûceb-i defter mâlike olduğu câmeşûy âlâtını vefâen bana bey‘ ve teslîm etmekle âlât-ı merkūmeyi fek ile meblağ-ı merkūm yüz altmış guruşu merkūme Bekzada Nasrâniyeden hâlâ taleb ederim deyü ba‘de’d-da‘vâ ve’l-istintâk ve’l-inkâr müdde‘î-i merkūm ber-vech-i muharrer müdde‘âsını udûlden Osman Usta b. İsmail ve es-Seyyid el-Hâc Mehmed b. es-Seyyid Mahmud nâm kimesneler şehâdetleriyle vech-i şer‘î üzere muvâcehesinde isbât etmeğin mûcebiyle âlât-ı mezkûreyi fek ile meblağ-ı merkūm yüz altmış guruşu müdde‘î-i merkūm Kosta’ya edâ ve teslîme merkūme Bekzada Nasrâniye’ye şer‘an tenbîh olunduğu tescîl ve bi’l-iltimâs huzûr-ı âlîlerine i‘lâm olundu. Fî 24 min-Zilka‘de sene 1204