Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 268 Hüküm no: 280 Orijinal metin no: [25a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı İbrahim Ağa b. Yusuf’a borcu olan Mehmed Beşe’nin borcunu ödemesi Ma‘rûz Mahmiye-i İslâmbol’da Yemiş İskelesi’nde sâkin el-Hâc İbrahim Ağa b. Yusuf nâm kimesne medîne-i Üsküdar’da mahfil-i bâbda meclis-i şer‘-i hatîrde medîne-i mezbûreye tâbi‘ Yakacık karyesi ahâlisinden Mehmed Beşe b. Mehmed nâm kimesne mahzarında mezbûr Mehmed Beşe bin iki yüz iki senesi Cumâdelûlâ gurresi târihiyle müverrah yedime i‘tâ eylediği bir kıt‘a temessük mantûkunca cihet-i karzdan istidâne ve kabz ve kendi umûruna sarfla istihlâk eylediği yüz bir guruşun kırk guruşunu yedinden ahz bâkī altmış bir guruş mezbûr Mehmed Beşe zimmetinde kalmağla hâlâ taleb ederim deyü da‘vâ ol dahi cevâbında cihet-i mezkûreden ol-mikdâr deyni bâkī kaldığını ikrâr lâkin müdde‘î-i mezbûr el-Hâc İbrahim Ağa’nın bi-şarti’r-rücû‘ emriyle gāib ani’l-meclis Kürd Hüseyin Ağa’nın karye-i mezbûre toprağında vâki‘ ma‘lûmü’l-hudûd bağının tımarını rü’yet ve ücretimden terâküm eden cem‘an altmış guruşun otuz guruşunu deynim olan meblağ-ı bâkī-i merkūm altmış bir guruşun otuz guruşuna mahsûb ve takas eyledikde ben dahi ber-vech-i muharrer mukāssa ve kabûl etmemle müdde‘î-i mezbûr el-Hâc İbrahim Ağa’ya ancak otuz bir guruş deynim bâkī kalmış idi [deyü] ba‘de’d-def‘ ve’l-inkâr mezbûr Mehmed Beşe eylediği def‘ini isbâta kādir olamayıp talebiyle müdde‘î-i mezbûr el-Hâc İbrahim Ağa gıbbe’t-tahlîfi’ş-şer‘î mezbûr Mehmed Beşe’nin ikrârı mûcebince meblağ-ı bâkī-i merkūm altmış bir guruşu müdde‘î-i mezbûr el-Hâc İbrahim Ağa’ya edâ ve teslîme mezbûr Mehmed Beşe’ye şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 15 min-Zilhicce sene 1204