Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 268 Hüküm no: 279 Orijinal metin no: [25a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karabet v. Hriyod’un, torunu Derohi’nin annesi Ogida bt. Arakil’in yanında almasını kabul ettiği Ma‘rûz Medîne-i Üsküdar’a tâbi‘ Kādı karyesinde mütemekkin Karabet v. Hriyod nâm zimmî medîne-i mezbûrede mahfil-i bâbda meclis-i şer‘-i hatîrde Ogida bt. Arakil nâm Nasrâniye tarafından vekîl-i şahs-ı merkūmeyi bi’l-mu‘arrefeti’ş-şer‘iye ârifân el-Hâc Ahmed Ağa b. el-Hâc Hüseyin ve İsmail Ağa b. Ahmed nâm kimesne şehâdetleriyle sâbit olan Mıgırdıç v. İstefan nâm zimmî muvâcehesinde müvekkile-i merkūme Ogida Nasrâniye bundan akdem hâlik olan sulbî kebîr oğlum Manas zimmînin zevce-i medhûlün-bihâsı olup oğlum hâlik-i merkūmun firâşından hâsıla ve müvekkile-i merkūmeden mütevellide Derohi nâm sagīre merkūme Ogida Nasrâniyenin bi-hakkı’l-hıdâne hacr ü terbiyesinde olup <> sagīre-i merkūme için benden bi’r-rızâ kadr-ı ma‘rûf meblağ ahz ve sagīre-i merkūmeyi infâk üzere iken müvekkile-i merkūme nefsini sagīre-i merkūmeye ecnebîye tezvîc ve hakk-ı hidânesi sâkıt olmağla sagīre-i merkūmeyi bana teslîme müvekkile-i merkūmeye tenbîh olunmak bi’l-velâye matlûbumdur deyü da‘vâ eylediğimde beynimizde münâza‘ât-ı kesîre vâkı‘a olmuş idi el-hâletü hâzihî müvekkile-i merkūme Ogida Nasrâniye sagīre-i merkūmeyi bilâ-nafaka kendi mâlından teberru‘an infâk ve iksâ edip benden nafaka mutâlebe etmemek üzere ta‘ahhüd eyledikde ben dahi bi’r-rızâ sagīre-i merkūmeyi anası müvekkile-i merkūme yanında terk ve ibkā eyledim deyü müdde‘î-i merkūmun bi’l-cümle takrîr-i meşrûhunu vekîl-i merkūm tasdîk edip bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 5 min-Zilhicce sene 1204