Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 269 Hüküm no: 282 Orijinal metin no: [25a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Celeb Ali’nin kaybolan parasını ödemeleri talebiyle Ahmed b. Hasan ile Kirkor v. Serope’ye açtığı davanın reddedildiği Ma‘rûz Celeb tâifesinden Ali b. Halil medîne-i Üsküdar’da mahfil-i bâbda meclis-i şer‘-i hatîrde Ahmed b. Hasan nâm kimesne ile Kirkor v. Serope nâm zimmî muvâcehelerinde târih-i i‘lâmdan beş gün mukaddem medîne-i mezbûrede Dârü’s-sa‘âdeti’ş-şerîfe Ağası Çeşmesi kurbünde vâki‘ mezbûr Ahmed’in dükkânı derûnunda akçe ta‘dâd eder iken kesem derûnunda mevcûd yüz yirmi guruşum mücerred dükkân-ı mezkûr derûnunda zâyi‘ olup lâkin akçe ta‘dâd olunurken merkūm Kirkor zimmînin rü’yeti ve merkūm Ahmed’in dükkânında zâyi‘ olduğuna binâen meblağ-ı merkūmu mezbûrândan hâlâ taleb ederim deyü müdde‘î-i mezbûrun ber-vech-i muharrer takrîri üzere tasaddî eylediği da‘vâ-yı gayr-ı meşrû‘asına iltifât olunmadığı ba‘de’t-tescîl bi’l-iltimâs huzûr-ı âlîlerine i‘lâm olundu. Fî 14 min-Zilhicce sene 1204