Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 270 Hüküm no: 283 Orijinal metin no: [25b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üsküdar’ın Hacıhatun mahallesi mektebi vakfından borç (vefa) alan Fatma bt. Süleyman’ın borcunu ödemesi Ma‘rûz Medîne-i Üsküdar’da Hacce Hatun mahallesinde vâki‘ mekteb-i şerîf vakfının vâkıfı ve mütevellîsi el-Hâc İsmail Efendi b. Ebûbekir tarafından ber-vech-i âtî vekîl olduğu Halil b. Ahmed ve Bekir [b.] Mustafa nâm kimesneler şehâdetleriyle sâbit olan vakf-ı mezbûrun câbîsi es-Seyyid Mehmed Said Efendi b. Ahmed nâm kimesne medîne-i mezbûrede mahfil-i bâbda meclis-i şer‘-i hatîrde mu‘arrefetü’z-zât Fatıma bt. Süleyman nâm hatun mahzarında bundan akdem mezbûre Fatıma mâl-ı vakf-ı mezbûrdan olmak üzere mütevellî-i mezbûr yedinden istikrâz ve kabz eylediği yetmiş guruş deyni mukābelesinde mahalle-i mezbûrede kâin lede’l-ahâli ve’l-cîrân ma‘lûmü’l-hudûd ber-mûceb-i temessük mutasarrıfe olduğu bir bâb vakf menzilini mütevellî-i mezbûra vefâen ferâğ ve tefvîz ol dahi ba‘de’t-tefevvüz menzil-i mezkûru beher şehr otuz beşer para ücret kavliyle ba‘de’t-tahliye ve’t-takābuz mezbûre Fatıma Hatun’a îcâr ve teslîm eyledikde ol dahi ber-vech-i muharrer istîcâr ve tesellüm ve kabûl edip menzil-i mezkûr icâresinden on iki ayda mezbûre Fatıma zimmetinde müctemi‘a olan on buçuk guruş ki cem‘an seksen buçuk guruş taraf-ı vakf-ı şerîf için bi’l-vekâle taleb ederim deyü da‘vâ ettikde mezbûre Fatıma cevâbında ber-vech-i muharrer ikrâr ü i‘tirâf edip lâkin meblağ-ı mezbûru def‘aten edâya iktidârı olmayıp istimhâl etmeğin müdde‘î-i mezbûr dahi işbu târih-i i‘lâmdan otuz gün tamamında kırk guruş bir rub‘ ve altmış gün tamamında dahi kırk guruş bir rub‘ ki cem‘an seksen buçuk guruş edâ etmek üzere vekîl-i mezbûr imhâl eyledikde mezbûre Fatıma dahi müddet-i mehl tamamında meblağ-ı mecmû‘-ı merkūm seksen buçuk guruşu edâya ta‘ahhüd ve bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 29 min-Şevvâl sene 1204