Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 397 Hüküm no: 407 Orijinal metin no: [93b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Ömer ile eşi Osman b. Ebûbekir’in muhala‘a yoluyla boşandıkları Muhâla‘a. Mahmiye-i İstanbul’da Kalenderhâne Mahallesi’nde sâkine olup zâtı karındaşı Abdülhâdi Çelebi b. Ömer ve el-Hâc Abdullah b. Ali nâm kimesneler ta‘rîfleriyle mu‘arrefe olan Fâtıma bt. Ömer nâm hatun meclis-i şer‘-i hatîr-i lâzımü’t-tevkīrde işbu hâfızü’l-kitâb Osman b. Ebûbekir mahzarında ikrâr ve takrîr-i kelâm edip mezbûr Osman Ağa zevcim olup beynimizde hüsn-i mu‘âşeret olmamağla hüccet-i deyn-i şer‘iyyeden zimmetinde hakkım olan beş yüz guruşdan mâ‘adâ zimmetinde mütekarrir ve ma‘kūdun-aleyh beş yüz guruş mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime ve Mehmed Emin Ağa nâm kimesneye mezbûr Osman Ağa’nın deyni olan üç bin guruşu ben mâlımdan etmek üzere ve mahalle-i mezbûrede vâki‘ ma‘lûmü’l-hudûd ve’l-müştemilât mülk menzilimi mukaddemâ Canbaz İbrahim nâm kimesneye bi-tarîkı’l-istiğlâl bin yüz elli guruşa bey‘ ve teslîm edip meblağ-ı mezbûrun altı yüz elli guruşunu kendi mâlımdan edâ ve mezbû[ru]n firâşından hâsıl ve benden mütevellid sadrî oğullarım Hüseyin ve Abdulkādir nâm sagīrleri dahi târih-i kitâbdan üç sene tamamına değin kendi mâlımdan infâk ve iksâ etmek üzere mezbûr Osman Ağa ile muhâla‘a-i sahîha-i şer‘iyye ile muhâla‘a olduğumda ol dahi hul‘-ı mezbûru ba‘de’l-kabûl bâlâda mezkûr beş yüz guruşdan mâ‘adâ hukūk-ı zevciyyete ve sâir beynimizde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i de‘âvî ve kâffe-i mütâlebât ve eymân ve muhâsamâtdan her birimiz âharın zimmetini ibrâ-i âmm-ı râfi‘u’l-hısâm ile ibrâ ve iskāt eylediğimizden sonra mezbûr Osman Ağa zimmetinde bâkī meblağ-ı mezbûr beş yüz guruşu târih-i kitâbdan üç yü[z] altmış bir gün tamamına değin te’cîl eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis ve’l-ışrîn min-Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: Ahmed Ağa b. Lütfullah, Mustafa Ağa b. Ali, Mehmed Ağa b. Ali, el-Hâc Abdullah b. Ali, Halil b. Abdullah, Mehmed Beşe b. Abdullah, İbrahim Çelebi b. Mehmed.