Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 396 Hüküm no: 406 Orijinal metin no: [93b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa’nın ulemâya şart ettiği menzilinin Ali Efendi’ye tevcih olunduğu Ashâb-ı hayrâtdan Ahmed Ağa b. Salih nâm sâhibü’l-hayrın süknâsı ulemâdan bir recül-i sâlihe meşrûta vakfı olup mahmiye-i İstanbul’da Ereğli Mahallesi’nde vâki‘ bir tarafdan Gülşenî Halveti Tekkesi ve bir tarafdan silâhdâr kâtibi Mehmed Ağa menzili ve bir tarafdan imâma meşrûta menzil ve bir tarafdan tarîk-i âm ile mahdûd fevkānî iki oda ve iki sofa ve bi’r-i mâ ve bahçe ve kenîfi ve dükkân ve matbahı müştemil menzile tevcîh-i hâkimü’ş-şer‘le mutasarrıf olan es-Seyyid İbrahim b. es-Seyyid Abdülgaffar nâm kimesne ulemâ ve sulehâdan Ali Efendi b. İbrahim’e kendi hüsn-i rızâsıyla menzil-i mezbûru kasr-ı yed etmekle mûcebince hâkim-i muvakki‘-ı sadr-ı kitâb -tûbâ-lehû ve hüsnü meâb- efendi hazretleri dahi menzil-i mahdûd-ı mezkûru mezbûr Ali Efendi’ye tevcîh etmeğin tasarrufi’çün işbu sahîfe-i sahîha ketb ve imlâ olundu. Fi’l-yevmi’s-sâbi‘ ve’l-ışrîn min-Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: İmâm Mustafa Efendi b. Ahmed an-mahalle-i mezbûr, Müezzin Mustafa Halîfe b. Ali, Ahmed Ağa b. Ahmed, Halil Ağa b. Osman, el-Hâc Ahmed Ağa b. Mehmed, Mehmed Çelebi b. İbrahim, Mustafa Çelebi b. Abdullah, Ahmed Efendi b. Osman, Ömer Efendi b. Ahmed, Mustafa b. Abdullah.