Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 276 Hüküm no: 295 Orijinal metin no: [26b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Süleyman’ın Ali Ağa’dan satın aldığı bahçe âletlerini Ali Ağa’nın da aldığı bedeli iade etmeleri Ma‘rûz Medîne-i Üsküdar’da Solaksinan mahallesinde sâkin es-Seyyid Süleyman b. Halil nâm kimesne medîne-i mezbûrede mahfil-i bâbda meclis-i şer‘-i hatîrde Ali Ağa b. Ahmed mahzarında mezbûr Ali Ağa mahalle-i mezbûrede vâki‘ ma‘lûmü’l-hudûd bir bâb şükûfe bağçesinin derûnunda mevcûd ma‘lûmü’l-aded eşcâr-ı müsmire ile sâir âlât-ı lâzımesini bana gedik olmak şartıyla iki yüz guruş semen-i makbûza bey‘ ve temlik ben dahi şart-ı mezkûr ile iştirâ ve kabûl etmiş idim el-hâletü hâzihî şart-ı mezkûr ile akd-i mezbûrun fesâdına binâen makbûzu olan meblağ-ı mezbûr iki yüz guruşu mezbûr Ali Ağa’dan istirdâd ederim deyü da‘vâ ettikde ol dahi cevâbında ber-vech-i muharrer ikrâr ü i‘tirâf etmeğin mûcebiyle gedik-i mezkûru mezbûr Ali Ağa’ya red ve meblağ-ı merkūm iki yüz guruşu müdde‘î-i mezbûra edâ ve teslîme mezbûr Ali Ağa’ya şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 29 min-Zilhicce sene 1204