Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 277 Hüküm no: 298 Orijinal metin no: [26b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Usulsüz olarak kiralanan vakıf evin sahibine iadesi Ma‘rûz Medîne-i Üsküdar’da Selami mahallesinde sâkine ve zâtı mu‘arrefe Hadice bt. Süleyman b. Abdullah nâm hatun medîne-i mezbûrede mahfil-i bâbda meclis-i şer‘-i hatîrde zikri âtî menzile vâzı‘ü’l-yed olan es-Seyyid Ali b. Mehmed nâm kimesne muvâcehesinde ashâb-ı hayrâtdan üvey vâlidem Âişe bt. Abdullah nâm hatun işbu yedimde olan bin yüz kırk sekiz senesi târihiyle müverrah bir kıt‘a vakfiye-i ma‘mûlün-bihâsı nâtıka olduğu üzere medîne-i mezbûrede Evliyâhoca mahallesinde vâki‘ lede’l-ahâli ve’l-cîrân ma‘lûmü’l-hudûd ve’l-müştemilât bir bâb mülk menzilini vakf-ı sahîh ile vakf edip süknâ ve tasarrufunu evvelen kendiye ba‘dehâ zevci babam mezbûr Süleyman’a ba‘dehû mezbûr Süleyman’ın âhar zevcesi anam Zeyneb bt. Mustafa’ya ba‘dehâ mezbûr Süleyman’ın batnen ba‘de batnin evlâd-ı evlâdına ba‘de inkırâzi’l-evlâd icâreteyn ile âhara îcâr ve hâsıla olan icâresi sâlifü’z-zikr Evliyâhoca Mescid-i şerîfi’nde imâm olanlara şart ve ta‘yîn ve şart-ı vâkıf üzere ben menzil-i mezkûrda sâkine iken bin yüz seksen iki senesi mescid-i mezkûrda imâm olan es-Seyyid Osman Efendi netîcesi imâma meşrûtadır deyü menzil-i mezkûrdan beni ihrâc ve senevî üçer guruş icâre-i müeccele ve mu‘accele ile hilâf-ı şart-ı vâkıf mezbûr es-Seyyid Ali’ye îcâr etmiş idi el-hâletü hâzihî yedimde olan fetvâ-yı şerîfe mûcebince bu misillü süknâsı meşrûta olan menzilin icâreteyn ile âhara îcârı meşrû‘a olmamağla mezbûr es-Seyyid Ali menzil-i mezkûrdan keff-i yed ve şart-ı vâkıf üzere bana teslîme tenbîh olunmak matlûbumdur deyü da‘vâ ve mezbûr es-Seyyid Ali cevâbında fi’l-hakīka menzil-i mezkûru vâkıfe-i mezbûrenin süknâsı meşrûta-i vâkıf olup ber-mûceb-i vakfiye-i ma‘mûlün-bihâsı târih-i merkūmda imâm-ı mezbûr hilâf-ı şart-ı vâkıf icâreteyn ile kendiye îcârını ve müdde‘iye-i mezbûre Hadice Hatun meşrûtün-lehâ olduğunu ikrâr ü i‘tirâf etmeğin mûcebiyle mezbûr es-Seyyid Ali menzil-i mezkûrdan kasr-ı yed ve şart-ı vâkıf üzere müdde‘iye-i mezbûre Hadice Hatun’a teslîme tenbîh olunduğu bi’l-iltimâs huzûr-ı âlîlerine i‘lâm olundu. Fî 5 min-Zilhicce sene 1204