Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 398 Hüküm no: 409 Orijinal metin no: [94a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Hüseyin’in vefât eden Köse Ali Ağa’ya olan borcunu vâris olduklarını ispatlayan Ömer b. Halil ve kardeşi Ahmed’e ödemesi tenbihi İsbât-ı verâset, Hezargrad. Vilâyet-i Rumeli’nde Hezargrad nevâhîsinden Karalom nâhiyesine tâbi‘ Lütfi nâm karye ahâlîsinden olup Bahr-ı sefîd’de Midilli cezîresinde müsâfiren sâkin iken bundan akdem vefât eden Köse Ali Ağa b. Kara Hasan b. Receb’in li-eb er karındaşı oğulları ve ber-vech-i âtî vârisler olduklarını iddi‘â eden işbu bâ‘isü’l-kitâb Ömer ve Ahmed ibney Halil nâm kimesneler meclis-i şer‘-i şerîf-i enverde Mehmed b. Hüseyin nâm kimesne mahzarında her biri üzerine da‘vâ takrîr-i kelâm edip babamız mezbûr Halil müteveffâ-i mezbûr Köse Ali Ağa ile li-eb karındaşlar olup babaları ismi mezbûr Kara Hasan dedeleri ismi mezbûr Receb ve maskat-ı re’simiz karye-i mezbûredir. Biz müteveffâ-i mezbûrun ber-vech-i muharrer min-ciheti’l-usûbeti’n-nesebiye hasren vârisleri olup bizden gayrı vârisi ve terekesine müstahik âhar olmamağla müteveffâ-i mezbûrun mezbûr Mehmed zimmetinde cihet-i karzdan on beş guruş hakkı olmağla kable’l-ahz vefât etmeğin meblağ-ı mezbûr bi’l-irsi’ş-şer‘î bize isâbet ve intikāl etmekle merkūm Mehmed’e suâl olunup meblağ-ı mezbûru bize edâ ve teslîme tenbîh olunması matlûbumuzdur dedikde gıbbe’s-suâl mezbûr Mehmed cevâbında müteveffâ-i mezbûra cihet-i merkūmeden meblağ-ı mezbûr zimmetinde deyni olduğunu ikrâr lâkin müdde‘iyân-ı mezbûrânın ber-minvâl-i muharrer vâris olduklarını inkâr edicek müdde‘iyân-ı mezbûrândan müdde‘âlarını mübeyyine beyyine taleb olundukda udûl-i ahrâr-ı ricâl-i Müslimînden ve karye-i mezbûre ahâlîsinden olup mahmiye-i İstanbul’da Küçük Karaman’da vâki‘ Emir Ahmed Hanı’nda müsâfiren sâkin İvaz b. Hüseyin ve Ali b. Mehmed nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müdde‘iyân-ı mezbûrânın babaları Halil müteveffâ-i mezbûr Köse Ali Ağa ile li-eb er karındaşlar olup babaları ismi Kara Hasan dedeleri ismi Receb ve maskat-ı re’sleri vilâyet-i Rumeli’nde Hezargrad nevâhîsinden Karalom nâhiyesine tâbi‘ Lütfi karyesidir. Müteveffâ-yı mezbûrun müdde‘iyân-ı mezbûrân min-ciheti’l-usûbeti’n-nesebiye hasren vârisleridir. Mezbûrândan gayrı vârisi ve terekesine müstahik âhar olduğu ma‘lûmumuz değildir. Biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye ettikde gıbbe’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm ve’t-tenbîh mâ-vaka‘a bi’t-taleb ketb olundu. Fi’l-yevmi’s-sâdis ve’l-ışrîn min-Şa‘bâni’l-mu‘azzam sene 1143. Şuhûdü’l-hâl: İbrahim Ağa el-mütevellî bi-Hezargrad, es-Seyyid Ahmed Çelebi b. ( ), Kurd Ağa b. ( ), İsmail Ağa b. ( ), Süleyman Çelebi b. Mehmed, Hasan Efendi.