Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 399 Hüküm no: 410 Orijinal metin no: [94a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Beşe’nin vefât eden Hadice Hatun’a olan borcunu vereseden el-Hâc Ahmed’in vekili Süleyman Beşe’nin ödemesi tenbihi Medîne-i İznikmid mahallâtından Ömerağa Mahallesi ahâlîsinden iken bundan akdem vefât eden Hadice Hatun bt. el-Hâc Ali b. Abdullah’ın ammi oğlu ve min-ciheti’l-usûbeti’n-nesebiye hasren vârisi el-Hâc Ahmed b. Mustafa b. Yusuf tarafından ber-vech-i âtî vekâlet iddi‘â eden bâ‘isü’l-kitâb Süleyman Beşe b. Hasan nâm kimesne meclis-i şer‘-i şerîf-i enverde Ahmed Beşe b. Mehmed mahzarında üzerine da‘vâ ve takrîr-i kelâm edip mezbûr el-Hâc Ahmed’in mûrisesi müteveffât-ı mezbûrenin hayâtında cihet-i karz-ı şer‘îden on guruş hakkı olup kable’l-ahz fevt olmağla mezbûre ber-vech-i muharrer irsen mezbûr el-Hâc Ahmed’e intikāl etmeğin mezbûr el-Hâc Ahmed meblağ-ı mezbûru merkūm Ahmed Beşe’den taleb ve da‘vâ ve ahz u kabz ve kendiye îsâle tarafından beni vekîl ve nâib-i menâb nasb ve ta‘yîn eyledikde ben dahi vekâlet-i mezbûreyi kabûl eylediğim ecilden mezbûr Ahmed Beşe’ye suâl olunup meblağ-ı mezbûr on guruşu bana edâ ve teslîme tenbîh olunması bi’l-vekâle matlûbumdur dedikde gıbbe’s-suâl mezbûr Ahmed Beşe cevâbında fi’l-hakīka mezbûr el-Hâc Ahmed’in mûrisesi müteveffât-ı mezbûre Hadice Hatun’a cihet-i merkūmdan on guruş zimmetinde deyni olduğunu ikrâr lâkin müdde‘î-i mezbûrun ber-vech-i muharrer vekîl olduğu ma‘lûmum değildir deyü inkâr edicek müdde‘î-i mezbûrdan müdde‘âsını mübeyyine beyyine taleb olundukda udûl-i Müslimînden olup mahmiye-i İstanbul’da Küçük Mustafapaşa Mahallesi ahâlîsinden el-Hâc Mehmed b. Abdurrahman ve Mustafa Beşe b. Veli nâm kimesne[ler] li-ecli’ş-şehâde meclis-i şer‘a hâzırân olup isre’l-istişhâd fi’l-hakīka işbu müdde‘î-i mezbûr Süleyman Beşe’yi müvekkil-i mezbûr el-Hâcı Ahmed b. Mustafa b. Yusuf mûrisesi müteveffât Hadice bt. Ali b. Abdullah’ın merkūm Ahmed Beşe zimmetinde cihet-i karz-ı şer‘îden hakkı olan meblağ-ı mezbûr on guruşu mezbûr Ahmed Beşe’den taleb ve da‘vâ ve ahz [u] kabz ve kendiye îsâle tarafından bizim huzûrumuzda vekîl ve nâib-i menâb nasb ve ta‘yîn eylediğimde [eylediğinde] ol dahi vekâlet-i mezbûreyi kabûl ve hizmet-i lâzimesini edâya ta‘ahhüd ve iltizâm eyledi biz bu husûsa bu vech üzere şâhidleriz ve şehâdet dahi ederiz deyü her biri edâ-yı şehâdet-i şer‘iyye ettikde gıbbe’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm ve’t-tenbîh mâ-hüve’l-vâki‘ bi’t-taleb ketb olundu. Hurrire fi’r-râbi‘ ve’l-ışrîn min-Şa‘bâni’l-mu‘azzam sene 1143. Şuhûdü’l-hâl: es-Seyyid el-Hâc Halil b. es-Seyyid Hasan, Süleyman Reis b. Mehmed, İbrahim Beşe b. Hüseyin, Mustafa Beşe b. Ömer.