Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 299 Hüküm no: 339 Orijinal metin no: [30a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeliha bt. İsmail’in, Ayşe bt. Mehmed’e açtığı kefalet davasını ispat edemediği Ma‘rûz Medîne-i Üsküdar’da Vâlide-i [Atik] mahallesinde sâkine ve zâtı mu‘arrefe arzuhâlde ismi mezkûre Zeliha bt. İsmail nâm hatun Çarşamba günü Dîvân-ı âlî’de ma‘kūd meclis-i şer‘-i hatîrde kezâlik zâtı mu‘arrefe sâhibe-i arzuhâl Âişe bt. Mehmed nâm hatun mahzarında mezbûre Âişe Hatun’un hâlâ zevci olup mukaddemâ dâmâdım olan gāib ani’l-beled Derviş Ali b. Mehmed zimmetinde bi-şarti’r-rücû‘ emriyle zevcesi kızımın nafakasına harc ü sarf eylediğim altı yüz kırk guruş hakkımı bin iki yüz dört senesi evâhir-i Şevvâl’de Bâb-ı sadr-ı âlî karşısında gāib-i mezbûr Derviş Ali’den taleb ve ahz için tazyîk eylediğimde zevcesi işbu mezbûre Âişe Hatun meblağ-ı merkūm altı yüz kırk guruş hakkıma bi’l-emr ve’l-kabûl kefîl ve dâmine olmağla kefâletine binâen meblağ-ı merkūm altı yüz kırk guruşu mezbûre Âişe Hatun’dan taleb ederim deyü ba‘de’d-da‘vâ ve’l-istintâk ve’l-inkâr müdde‘iye-i mezbûre ber-vech-i muharrer müdde‘âsını isbât için ba‘de’l-istimhâl ve’l-imhâl müddet-i mehl-i şer‘î tamam ve bir hafta dahi mürûr edip müdde‘âsını isbâta kādire olamayıp tahlîfe dahi tâlibe olmamağla mûcebiyle müdde‘iye-i mezbûre Zeliha Hatun da‘vâ-yı mezkûresiyle mezbûre Âişe Hatun’a bilâ-beyyine mu‘ârazadan men‘ olunduğu mübâşiri çavuş kulları iltimâsıyla huzûr-ı âlîlerine i‘lâm olundu. Fî 3 min-Safer sene 1205