Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 300 Hüküm no: 340 Orijinal metin no: [30a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Feyzullah Efendi’nin boşandığı hanımı Emine’de kalan eşyalarının kendisine iade edilmesi Ma‘rûz Medîne-i Üsküdar’da Hasanağa mahallesi sükkânından olup hâlâ Bahr-ı Sefîd’de Eğriboz Cezîresi’nde sâkin olan Feyzullah Efendi b. İbrahim nâm kimesne tarafından ber-vech-i âtî taleb ve da‘vâ ve ahz ü kabza bâ-hüccet-i şer‘iye kabûlüne mevkūfe vekîl olduğu Hasan Ağa b. Hızır ve Mehmed Ağa b. Halil nâm kimesneler şehâdetleriyle sâbit olan es-Seyyid Osman Efendi b. es-Seyyid Mehmed nâm kimesne medîne-i mezbûrede mahfil-i bâbda meclis-i şer‘-i hatîrde müvekkil-i mezbûrun Sâbıkā zevcesi zâtı mu‘arrefe Emine bt. Yusuf nâm hatun muvâcehesinde müvekkilim mezbûr Feyzullah Efendi mezbûre Emine Hatun ile zevciyet beynlerinde kāim iken târih-i i‘lâmdan iki sene mukaddem diyâr-ı âhara azîmet ve ma‘an sâkin oldukları menzilde mevcûd eşyâ-i memlûkesinden mecmû‘-ı kıymetleri iki yüz otuz altı guruşa bâliğ bir kadife kaplı âyine ve bir kadife kaplı çekmece ve bir altın sâat ve bir şal kuşak ve bir top keremsûd ve iki top Haleb çitârîsi ve on Kıbrıs yasdığı ve üç Kıbrıs mak‘adı ve bir çiçekli entari ve bir çuka şalvar ve bir yedek örtüsü ve bir at başlığı ve çiçekli ve basma iki yorganını mezbûre Emine Hatun yedine bi-tarîki’l-âriye vaz‘ ve teslîm edip hâlâ yedinde olmağla bi’l-vekâle taleb ederim deyü da‘vâ ol dahi cevâbında zikr olunan eşyâyı ahz ve hâlâ yedinde mevcûd olduğunu ikrâr edip lâkin zikr olunan eşyâdan bir kadife kaplı âyine ve bir kadife kaplı çekmece ve bir altın sâat ve bir şal kuşak ve bir top keremsûd ve iki top çitârîyi müvekkil-i mezbûr Feyzullah Efendi bana hibe ve teslîm etmiş idi deyü ba‘de’d-def‘ ve’l-inkâr dâfi‘a-i mezbûre ber-vech-i muharrer def‘ini isbât için ba‘de’l-istimhâl ve’l-imhâl müddet-i mehl-i şer‘î tamam ve birkaç gün dahi mürûr edip mezbûre Emine Hatun bir vechile def‘ini isbâta kādire olmamağla müvekkil-i mezbûr Feyzullah Efendi mevkūfen ale’l-yemîn ikrârı mûcebince mecmû‘-ı eşyâ-i muharrere-i mezkûreyi müvekkil-i mezbûr için vekîl-i mezbûr es-Seyyid Osman Efendi’ye bâ-a‘yânihâ teslîme mezbûre Emine Hatun’a tenbîh olunduğu bi’l-iltimâs huzûr-ı âlîlerine i‘lâm olundu. Fî 5 min-S sene 1205