Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 303 Hüküm no: 345 Orijinal metin no: [30b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud Hüdai Vakfı’ndan aldıkları borca karşılık bağlarını rehin veren (vefa) Ümmügülsüm ile kızı Emetullah’ın kalan borçlarını ödemeleri Ma‘rûz Medîne-i Üsküdar’da vâki‘ merhûm kutbü’l-ârifîn Hüdâî eş-Şeyh es-Seyyid Mahmud Efendi vakfının kāimmakām-ı mütevellîsi Hafız Ali Efendi b. el-Hâc Mustafa medîne-i mezbûrede mahfil-i bâbda meclis-i şer‘-i hatîrde zâtları mu‘arrefe Ümmügülsüm bt. Hasan ile kebîre kızı Emetullah bt. Hüseyin nâm hatunlar muvâcehelerinde mezbûretân Ümmügülsüm ve Emetullah târih-i i‘lâmdan otuz ay mukaddem mâl-ı vakf-ı mezbûrdan bi-tarîki’l-karz istidâne ve kabz eyledikleri üç yüz guruş ve bâ-devr-i şer‘î iltizâm eyledikleri beher şehr tamamında yüz ellişer paradan üç sene tamamına değin yüz otuz beş guruş ki cem‘an dört yüz otuz beş guruş deynleri mukābelesinde ber-vech-i iştirâk yedlerinde mülkleri olan medîne-i mezbûre hâricinde Abdullah Ağa toprağında vâki‘ ma‘lûmü’l-hudûd bir kıt‘a kürûmu mülk bağlarını vakf-ı mezbûr için bana vefâen bey‘ ve teslîm etmişler idi el-hâletü hâzihî işbu târih-i i‘lâma gelince iltizâm eyledikleri beher şehr yüz ellişer paradan mezbûretân zimmetlerinde müctemi‘a olan yüz on üç buçuk guruşun otuz üç guruş üç rub‘unu yedlerinden ahz ve yetmiş dokuz guruş üç rub‘u zimmetlerinde bâkī kalmağla taraf-ı vakf için taleb ederim deyü ba‘de’d-da‘vâ ve’l-istintâk ve’l-ikrâr mûcebiyle meblağ-ı bâkī-i merkūm yetmiş dokuz guruş üç rub‘un edâsıyla mezbûretân Ümmügülsüm ve Emetullah hatunlardan herbiri ilzâm olundukları bi’l-iltimâs huzûr-ı âlîlerine i‘lâm olundu. Fî 12 min-Za sene 1204