Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 302 Hüküm no: 344 Orijinal metin no: [30b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Taşçı Praşkova’nın taş bedelinden alacağı olduğu iddiasıyla açtığı davada sulh olduğu Ma‘rûz Mevâdd-ı şer‘iye istimâ‘ı’çün kıbel-i şer‘-i şerîfden meb‘ûs Abdullah Efendi dâ‘îleri medîne-i Üsküdar’a tâbi‘ Kuzguncuk karyesine varıp mazbûtü’l-esâmî Müslimîn huzûrlarında akd-i meclis-i şer‘-i şerîf ettikde mahmiye-i İslâmbol hısnı ebvâbından Mevlevîhâne Yenikapısı’nda mütemekkin Taşçı Praşkova v. Gavril nâm zimmî meclis-i ma‘kūd-ı mezkûrda Kostanti Kalfa v. Hıristo nâm zimmî muvâcehesinde merkūm Kostanti Kalfa târih-i i‘lâmdan dört sene mukaddem yedimden iştirâ ve kabz eylediği mikdâr ve fiyâtı beynimizde ma‘lûm taş semeninden kırk guruş hakkımı taleb ederim deyü eylediği da‘vâsından bâ-tavassut-ı muslihîn otuz beş guruş bedel-i makbûz mukābelesinde merkūm Kostanti Kalfa ile sulh olup ziyâde beş guruşa müte‘allika âmme-i de‘âvîden merkūm Kostanti Kalfa’nın zimmetini ba‘de’l-ibrâ ve’l-kabûl kat‘-ı münâza‘a eyledikleri ba‘de’l-inhâ huzûr-ı âlîlerine i‘lâm olundu. Fî 8 min-Safer sene 1205