Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 310 Hüküm no: 360 Orijinal metin no: [31b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bahçıvan Nikola’nın emanet bıraktığı eşya ve parasıyla ilgili davada iddiasını ispat edemediği Ma‘rûz Arzuhâlde mezkûrü’l-ism medîne-i Üsküdar’da Kādıasker mahallesinde mütemekkin Bağçevân Nikola v. Mihal nâm zimmî medîne-i mezbûrede mahfil-i bâbda meclis-i şer‘-i hatîrde arzuhâl eden Yuvan v. Kostanti nâm zimmî muvâcehesinde târih-i i‘lâmdan yirmi gün mukaddem medîne-i mezbûrede Dârü’s-sa‘âdeti’ş-şerîfe Ağası Çeşmesi’nde vâki‘ merkūm Yuvan zimmînin mütemekkin olduğu bakkāl dükkânında merkūm Yuvan zimmîye bi-tarîki’l-emâne teslîm eylediğim bir aded sandık derûnunda mevcûd nakden yüz guruş ile eşyâ-i memlûkemden üç yelek ve bir kırmızı kuşak ve üç çevre ve bir entari ve bir çuka şalvar ve üç münakkaş uçkur ve dört yemeni ve bir fermene ve bir makramem hâlâ yedinde mevcûd olmağla nakd-i merkūm ile eşyâ-i muharrere-i mezkûreyi taleb ederim deyü da‘vâ ve merkūm Yuvan zimmî cevâbında eşyâ-i mezkûreyi ikrâr ve nakd-i merkūm yüz guruşu inkâr etmeğin müdde‘î-i merkūm ber-vech-i muharrer müdde‘âsını isbâta kādir olamayıp tahlîfe dahi tâlib olmamağla mûcebiyle müdde‘î-i merkūm nakd-i merkūm yüz guruş da‘vâsı’çün merkūm Yuvan zimmîye bilâ-beyyine mu‘ârazadan ba‘de’l-men‘ mertebe-i ikrârı olan eşyâ-i muharrere-i mezkûreyi müdde‘î-i merkūma teslîme merkūm Yuvan zimmîye ba‘de’t-tenbîh eşyâ-i muharrere-i mezkûreyi meclis-i şer‘de merkūm Yuvan müdde‘î-i mersûm Nikola’ya teslîm eylediği mübâşiri çavuş kulları iltimâsıyla huzûr-ı âlîlerine i‘lâm olundu. Fî 18 min-S sene 1205