Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 309 Hüküm no: 359 Orijinal metin no: [31b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Attar Lütfullah’ın alacak talebiyle açtığı davada iddia ettiği borç miktarını ispat edemediği Ma‘rûz Medîne-i Üsküdar’da Dârü’s-sa‘âdeti’ş-şerîfe Ağası Çeşmesi kurbünde sâkin Attâr Lütfullah b. Mehmed medîne-i mezbûrede mahfil-i bâbda meclis-i şer‘-i hatîrde Molla Mustafa b. el-Hâc İbrahim mahzarında mezbûr Molla Mustafa târih-i i‘lâmdan on gün mukaddem yedimden ve mâlımdan iştirâ ve kabz eylediği vezn ve fiyâtı beynimizde ma‘lûm attâr emti‘ası semeninden iki yüz yirmi üç guruş yirmi altı para hakkımın yüz guruşunu yedinden ahz ü kabz edip yüz yirmi üç guruş yirmi altı parası zimmetinde bâkī kalmağla taleb ederim deyü da‘vâ ve mezbûr Molla Mustafa cevâbında zikr olunan emti‘ayı ancak iki yüz on guruş yirmi üç paraya iştirâ ettiği[ni] ikrâr edip ziyâde on üç guruşu inkârından mâ‘adâ benim müdde‘î-i mezbûr Lütfullah zimmetinde attâr emti‘ası semeninden altmış guruş hakkım olup zimmetimde müdde‘î-i mezbûra deynim olan yüz on guruşun altmış guruşuna müdde‘î-i merkūma takas ve mahsûb eylediğinde ben dahi mukāssa ve kabûl edip zimmetimde ancak elli guruş yirmi üç para deynim bâkī kalmış idi deyü ba‘de’d-def‘ ve’l-inkâr evvelen müdde‘î-i mezbûr Lütfullah ziyâde on üç guruş üç para müdde‘âsını isbâtdan ızhâr-ı acz edip tâlib-i tahlîf dahi olmamağla ve mezbûr Molla Mustafa def‘-i mezkûrunu udûlden es-Seyyid Yakub b. es-Seyyid Mehmed ve Mustafa b. İsmail nâm kimesneler şehâdetleriyle muvâcehesinde isbât etmeğin mûcebiyle müdde‘î-i mezbûr Lütfullah da‘vâ-yı mezkûresiyle mezbûr Molla Mustafa’ya bilâ-beyyine mu‘ârazadan ba‘de’l-men‘ mezbûr Molla Mustafa’nın mertebe-i ikrârı olan elli guruş yirmi üç paranın müdde‘î-i mezbûr Lütfullah’a edâsıyla Molla Mustafa ilzâm olunduğu bi’l-iltimâs huzûr-ı âlîlerine i‘lâm olundu. Fî 27 min-M sene 1205