Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 314 Hüküm no: 368 Orijinal metin no: [32b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haçador v. Matos’un Fenâyî Ali Vakfı’ndan ödünç aldığı Ma‘rûz Medîne-i Üsküdar’da vâki‘ merhûm Fenâyî Ali Efendi vakfının mütevellîsi eş-Şeyh Mehmed Emin Efendi b. eş-Şeyh Abdullah medîne-i mezbûrede mahfil-i bâbda meclis-i şer‘-i hatîrde Haçador v. Matos nâm zimmî muvâcehesinde merkūm Haçador zimmî bundan akdem mâl-ı vakf-ı mezbûrdan olmak üzere yedimden bi-tarîki’l-karz istidâne ve kabz eylediği yüz otuz guruş deyni mukābelesinde Abdurrahman Efendi vakfı musakkafâtından olup medîne-i mezbûrede Pazarbaşı mahallesinde vâki‘ ma‘lûmü’l-hudûd ve’l-müştemilât bi’l-icâreteyn mutasarrıf olduğu bir bâb menzilini bâ-ma‘rifet-i mütevellî bana vefâen ferâğ eyledikden sonra yine menzil-i mezkûru beher şehr altmış beşer para ücret kavliyle ba‘de’t-tahliye ve’t-takābuz benden istîcâr ve kabûl ve on ay sâkin olup şühûr-ı mezkûrede menzil-i mezkûr ücretinden zimmetinde müctemi‘a olan on altı guruş bir rub‘ ki cem‘an yüz kırk altı guruş bir rub‘ vakf-ı mezbûra deyni olmağla menzil-i mezkûru rehniyetden ba‘de’l-fekk meblağ-ı merkūm yüz kırk altı guruş bir rub‘u vakf-ı mezbûr için merkūm Haçador zimmîden bi’t-tevliye taleb ederim deyü ba‘de’d-da‘vâ ve’l-istintâk ve’l-ikrâr mûcebiyle menzil-i mezkûru rehniyetden fek ile meblağ-ı merkūm yüz kırk altı guruş ve bir rub‘u vakf-ı mezbûr için mütevellî-i mezbûr eş-Şeyh Mehmed Emin Efendi’ye edâsıyla merkūm Haçador zimmî ilzâm olunduğu bi’l-iltimâs huzûr-ı âlîlerine i‘lâm olundu. Fî 12 min-S sene 1205