Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 313 Hüküm no: 367 Orijinal metin no: [32a-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Hacı Feyzullah’ın, bağından üzümlerini aldığı iddiasıyla Panço’ya açtığı tazminat davasını ispat edemediği Ma‘rûz Mevâdd-ı şer‘iye istimâ‘ı’çün kıbel-i şer‘-i şerîfden meb‘ûs Abdullah Efendi dâ‘îleri medîne-i Üsküdar’a tâbi‘ Çenger karyesine varıp mazbûtü’l-esâmî Müslimîn huzûrlarında akd-i meclis-i şer‘-i şerîf ettikde karye-i mezbûrede sâkin Mustafa b. el-Hâc Feyzullah meclis-i ma‘kūd-ı mezkûrda Panço v. İstoyan nâm zimmî muvâcehesinde merkūm Panço zimmî bundan akdem karye-i mezbûre hâricinde vâki‘ ma‘lûmü’l-hudûd bağıma duhûl ve derûnunda mevcûd elli guruş kıymetli üzümümü bi-gayrı hakkın kat‘ ve âhara bey‘le istihlâk etmekle kıymeti olan meblağ-ı merkūm elli guruşu hâlâ taleb ederim deyü ba‘de’d-da‘vâ ve’l-istintâk ve’l-inkâr müdde‘î-i mezbûr ber-vech-i muharrer müdde‘âsını isbâta kādir olamayıp talebiyle merkūm Panço zimmî gıbbe’t-tahlîfi’ş-şer‘î mûcebiyle müdde‘î-i mezbûr da‘vâ-yı mezkûresiyle merkūm Panço zimmîye bilâ-beyyine mu‘ârazadan men‘ olunduğu ba‘de’l-inhâ bi’l-iltimâs huzûr-ı âlîlerine i‘lâm olundu. Fî 22 min-Safer sene 1205