Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 330 Hüküm no: 403 Orijinal metin no: [35a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Salih b. Memiş’in kendisini Çavuşbaşı Çiftliği korusunda bıçaklayan Konyalı Mustafa’ya açtığı davada sulh olduğu Ma‘rûz Medîne-i Üsküdar’a muzâfe Yoros nâhiyesine tâbi‘ Çekme karyesi sâkinlerinden olup ber-vech-i âtî sol diz kapağı üzerinden Yatağan bıçağı yarasıyla mecrûh ve sâir a‘zâsı kara bere idiği lede’l-keşf ve’l-mu‘âyene zâhir olan Salih b. Memiş nâm kimesne medîne-i mezbûrede mahfil-i bâbda meclis-i şer‘-i hatîrde Konevî Mustafa b. Abdullah nâm kimesne tarafından ber-vech-i âtî tasdîka vekîl olan İbrahim Ağa b. Veli nâm kimesne mahzarında mezbûr Mustafa târih-i i‘lâmdan altı gün mukaddem vakt-i asrda karye-i mezbûre kurbünde Çavuşbaşı Çiftliği korusunda bi-gayrı hakkın amden sol diz kapağı[m] üzerinden Yatağan bıçağı ile darb ve cerh ve sâir a‘zâmı kara bere etmekle mûcib-i şer‘îsini hâlâ taleb ederim deyü eylediği da‘vâsından bâ-tavassut-ı muslihîn an-inkârin otuz guruş bedel-i makbûza mezbûr Mustafa ile sulh olup cerh-i mezkûra ve mâ-yuhdesü-minhe müte‘allika âmme-i de‘âvîden mezbûr Mustafa’nın zimmetini ba‘de’l-ibrâ ve’l-kabûl kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 10 min-Ra sene 1205