Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 330 Hüküm no: 402 Orijinal metin no: [35a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üsküdar Arkahamalları Kethudalığına Seyyid Ahmed Odabaşı’nın tayin edildiği Ma‘rûz Medîne-i Üsküdar ahâlisinden Sipâhpazarı kethudâsı ve pazarbaşı ve attârlar kethudâsı ve hancılar kethudâsı ve arpacılar kethudâsı ve kayıkcılar kethudâsı ve sâir ustaları ve arka hamallarından mazbûtü’l-esâmî cemm-i gafîr ve cem‘-i kesîr kimesneler medîne-i mezbûrede mahfil-i bâbda meclis-i şer‘-i hatîrde mahmiye-i İslâmbol hamalbaşısı tarafından medîne-i mezbûrede arka hamalları üzerlerine mücerrebü’l-etvâr ve umûrunda müstakīm bir kimesne cümle ma‘rifetiyle kethudâ nasb ol dahi ibâdullâhın nakl olunacak emvâl ve eşyâsını muhâfaza ve arka hamallarına dâimâ nezâret etmek nizâm-ı kadîmlerinden olduğuna binâen medîne-i mezbûrede ber-vech-i muharrer hamallar kethudâsı olan hâzır bi’l-meclis Bâyezid oğlu Mustafa b. Mustafa kethudâlık umûrunu rü’yet edemeyip nezâretde rehâvet edip kusûr etmekle umûr-ı ibâdullâh muhtel ve yerine bir mu‘temed kimesne kethudâ nasb olunmak lâbüd ve işbu hâzır bi’l-meclis es-Seyyid Ahmed Odabaşı b. Mehmed nâm kimesne cümlemizin emîni ve umûrunda istikāmeti olduğundan mâ‘adâ kethudâ-yı sâbık mezbûr Mustafa umûr-ı ibâdı rü’yetden ızhâr-ı acz ve bi’r-rızâ kethudâlıkdan keff-i yed etmiş idi deyü herbiri meclis-i şer‘de ihbâr etmeleriyle mezbûr es-Seyyid Ahmed Odabaşı kemâ-fi’s-sâbık mahmiye-i mezbûre hamalbaşısı tarafından medîne-i mezbûre arka hamalları üzerine kethudâ nasb ve tezkiresi yedine i‘tâ olunmak bâbında fermân-ı âlîleri sudûrunu herbiri istid‘â eyledikleri bi’l-iltimâs huzûr-ı âlîlerine i‘lâm olundu. Fî 27 min-S sene 1205