Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 333 Hüküm no: 409 Orijinal metin no: [35b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Küçükgöksu’daki bahçıvan esnafının kendilerini sürekli rahatsız eden Bahçıvan Dimo’nun aralarından ihraç edilmesi talepleri Ma‘rûz Medîne-i Üsküdar hâricinde Küçükgöksu nâm mahâlde vâki‘ bağçevân esnâfından Kosta v. Yani ve Yorgi v. Yani ve Dimitri v. Esteryo ve Yorgi v. Yani ve Vasil v. Yamandi ve Yorgi v. Hıristo ve Tanaş v. Dimo ve Yani v. İstemat ve Angeli v. İsteryo ve Yorgi v. Nikola ve Vasil v. Yorgi nâm zimmîler bi-ecma‘ihim medîne-i mezbûrede mahfil-i bâbda meclis-i şer‘-i hatîrde yine mahalle-i mezkûrda tâife-i mezkûreden Dimo v. İstemat nâm zimmî muvâcehesinde merkūm Dimo zimmî kendi hâlinde olmayıp beynimizde mer‘î ve mu‘teber olan nizâm-ı kadîmimize muhil hareket eylediğine binâen cümlemiz kendiye nush ü pend eylediğimizde mütenassıh olmayıp bize şetm eylediğinden mâ‘adâ bizi bi-gayrı hakkın ehl-i örfe gamz ve tecrîm ile ızrâr etmekle merkūmdan emniyetimiz bi’l-külliye meslûb olmuşdur deyü sû’-i hâlini muvâcehesinde ihbâr ve li-ecli’t-tedîb merkūm Dimo zimmî ihrâc olunmak bâbında fermân-ı âlîleri sudûrunu herbiri istid‘â ve istirhâm eyledikleri bi’l-iltimâs huzûr-ı âlîlerine i‘lâm olundu. Fî 19 min-Ra sene 1205