Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 351 Hüküm no: 449 Orijinal metin no: [38b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Marat v. Ağya’nın ortaklıklarını feshettikleri Mıgırdıç’ta alacağı olduğu iddiasıyla açtığı davanın reddedildiği Ma‘rûz Medîne-i Üsküdar’da Büyükhamam kurbünde tülbentci arzuhâlde mezkûr Marat v. Ağya nâm zimmî medîne-i mezbûrede mahfil-i bâbda meclis-i şer‘-i hatîrde arzuhâl eden Mıgırdıç v. Serkiz nâm zimmî muvâcehesinde merkūm Mıgırdıç zimmî ile bundan akdem tülbentcilik ticâretinde şerîk olup fesh-i şirket eylediğimizde beynimizde cereyân eden ahz ü i‘tâmızın hesâbını rü’yet ve işbu yedimde olan i‘lâm-ı şer‘î nâtık olduğu üzere ben merkūm Mıgırdıç zimmîden matlûbum olan iki yüz kırk guruşa ol dahi benden matlûbu olan dört yüz on guruşa ve bi’l-cümle husûs-ı şirkete müte‘allika âmme-i de‘âvîden herbirimiz âharın zimmetini ibrâ ve ıskāt etmiş iken merkūm Mıgırdıç zimmî benim gıyâbımda karındaşım gāib ani’l-meclis Serkiz zimmîden sâlifü’z-zikr dört yüz on guruşun üç yüz guruşuna mukaddemâ kefîl olmuş idin deyü karındaşım merkūmdan fuzûlî üç yüz guruş ahz ve karındaşım merkūm dahi benden ahz ü kabz etmekle mücerred karındaşım gāib-i merkūmdan ahz ettiğine binâen ben dahi merkūm Mıgırdıç zimmîden taleb ederim deyü takrîri üzere tasaddî eylediği da‘vâsı meşrû‘a olmayıp müdde‘î-i merkūm Marat zimmî da‘vâ-yı mezkûresiyle merkūm Mıgırdıç zimmîye bî-vech mu‘ârazadan men‘ olunduğu mübâşiri çavuş kulları iltimâsıyla huzûr-ı âlîlerine i‘lâm olundu. Fî 24 min-Ra sene 1205