Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 356 Hüküm no: 458 Orijinal metin no: [39b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Abdullah ile hanımı Ümmügülsüm’ün vârislerinin terekeden haksız yere para aldığı iddiasıyla açtıkları davada sulh olduğu Ma‘rûz Medîne-i Üsküdar’da İhsaniye mahallesinde sâkin iken bundan akdem vefât eden Ahmed b. Abdullah nâm kimesnenin verâseti zevce-i metrûkesi Ümmügülsüm bt. Ali nâm hatun ile sulbiye sagīre kızı Nefise’ye münhasıra ba‘dehû zevce-i mezbûre Ümmügülsüm dahi vefât edip verâseti sadriye sagīre kızı mezbûre Nefise ile babası mezbûr Ali ve anası Kâmile bt. Mehmed’e münhasıra ba‘dehâ sagīre-i mezbûre Nefise dahi vefât edip verâseti ancak anasının anası mezbûre Kâmile Hatun’a münhasıra ve tashîh meselesi bi-hükmi’l-münâsahati’ş-şer‘iye kırk sekiz sehm i‘tibârıyla kırk altı sehmi mezbûre Kâmile Hatun’a ve iki sehmi mezbûr Ali’ye isâbeti tahakkukundan sonra mezbûr Ali ile zâtı mu‘arrefe mezbûre Kâmile Hatun arzuhâlleri bâlâsında sâdır olan fermân-ı âlîlerine imtisâlen Çarşamba günü Dîvân-ı âlî’de ba‘dehû Üsküdar mahkemesinde meclis-i şer‘-i hatîrde Fatıma Hanım bt. el-Hâc Ahmed Ağa nâm sagīrenin anası ve vasîsi Zübeyde bt. Abdullah nâm hatun tarafından ber-vech-i âtî vekîl olduğu zât-ı mezbûreyi bi’l-mu‘arrefeti’ş-şer‘iye ârifân Hüseyin b. İsmail ve Mustafa b. Mehmed nâm kimesneler şehâdetleriyle sâbit olan Osman Ağa b. Mehmed mahzarında müteveffâ-yı evvel mezbûr Ahmed sagīre-i mezbûre Fatıma Hanım’ın babası mezbûr el-Hâc Ahmed Ağa’nın mukaddemâ abd-i memlûkü iken târih-i i‘lâmdan on beş sene mukaddem mâlından i‘tâk edip ba‘dehû on bir sene mürûrunda kızımız müteveffâ-yı sâniye mezbûre Ümmügülsüm’ü tezevvüc ve hîn-i akdde dahi mevlâsı mezbûr i‘tâkını ikrâr ba‘dehû fevt olup kızı mezbûre Fatıma Hanım için hakk-ı velâ yoğiken mezbûr Ahmed’in terekesinden iki yüz elli guruşluk mâlını vasîsi mezbûr kabz etmekle bi’l-verâse taleb ederiz deyü da‘vâ ve vekîl-i mezbûr cevâbında fi’l-hakīka müteveffâ-yı mezbûr Ahmed sagīre-i mezbûre Fatıma Hanım’ın babası mezbûr el-Hâc Ahmed Ağa’nın abd-i memlûkü olup târih-i i‘lâmdan sekiz sene mukaddem kızı sagīre-i mezbûreye hibe-i sahîha-i şer‘iye ile hibe ve temlik ba‘dehû yine sagīre-i mezbûre için bi’l-velâye ittihâb ve temellük ve kabz ve kabûl edip sagīre-i mezbûrenin gulâm-ı mevhûbu olduğu hâlde vefât etmekle cümle terekesi min-ciheti’l-velâ sagīre-i mezbûreye mevrûs olmuş iken müdde‘iyân-ı mezbûrân müteveffâ-yı mezbûr Ahmed’in dört yüz elli guruşluk terekesini bi-gayrı hakkın ahz etmeleriyle kasr-ı yed ve sagīre-i mezbûre için teslîme tenbîh olunmak bi’l-vekâle matlûbumdur deyü mukaddem târihiyle babası mezbûrun i‘tâkını inkâr ve tarafeynden herbiri müdde‘âlarını beyân esnâsında beynlerine muslihûn tavassut edip müdde‘iyân-ı mezbûrân Ali ve Kâmile Hatun sagīre-i mezbûre Fatıma Hanım’ın vasîsi mezbûrenin makbûzu olan iki yüz elli guruş da‘vâsında ve vekîl-i mezbûr dahi müdde‘iyân-ı mezbûrânın makbûzları olan dört yüz elli guruş da‘vâsından herbiri meccânen fâriğler olup müteveffâ-yı mezbûrun terekesinden herbiri âharın makbûzâtına ve bi’l-cümle husûs-ı mezkûra müte‘allıka âmme-i de‘âvîden âharın zimmetini bi’l-asâle ibrâ ve ıskāt edip fîmâ-ba‘d sagīre-i mezbûrenin müdde‘iyân-ı mezbûrân zimmetlerinde aslâ hakkı bâkī kalmayıp ve müdde‘iyân-ı mezbûrânın dahi sagīre-i mezbûre zimmetinde aslâ hakları bâkī kalmadı deyü müdde‘iyân-ı mezbûrânın takrîrlerini vekîl-i mezbûr tasdîk eylediği bi’l-iltimâs huzûr-ı âlîlerine i‘lâm olundu. Fî 3 min-Rebî‘ülâhir sene 1205