Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 355 Hüküm no: 457 Orijinal metin no: [39b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Dimitri’ye zahire bedelinden borcu kalan Mehmed’in borcunu ödemesi Ma‘rûz Medîne-i Üsküdar’da Arakıyeci el-Hâc Mehmed mahallesinde mütemekkin Bakkāl Dimitri v. Yorgi nâm zimmî medîne-i mezbûrede mahfil-i bâbda meclis-i şer‘-i hatîrde Mehmed Emin b. Ahmed nâm kimesne mahzarında mezbûr Mehmed Emin târih-i i‘lâmdan iki sene mukaddem yedimden iştirâ ve kabz eylediği ecnâs zehâir semeninden on altı guruş hakkımın dört guruşunu yedinden ahz ü istifâ ve on iki guruşu zimmetinde bâkī kalmağla taleb ederim deyü da‘vâ ve mezbûr Mehmed Emin cevâbında müdde‘î-i merkūma cihet-i mezkûreden ancak on dört guruş deyni olduğunu ikrâr ve ziyâde iki guruşu ba‘de’l-inkâr kabzını mu‘terif olduğu dört guruşdan mâ‘adâ on guruşu dahi gāib ani’l-meclis sadrazam çukadârlarından İsmail Ağa nâm kimesne benim için kendi mâlından müdde‘î-i mezbûra edâ ve teslîm etmiş idi deyü eylediği def‘ini isbâta kādir olamayıp ve müdde‘î-i merkūm dahi ziyâde müdde‘âsı olan iki guruşu kezâlik isbâta kādir olmamağla herbiri âharın talebiyle gıbbe’t-tahlîfi’ş-şer‘î mûcebiyle müdde‘î-i merkūm ziyâde müdde‘âsı’çün bilâ-beyyine mu‘ârazadan ba‘de’l-men‘ mezbûr Mehmed Emin ikrârı mûcebince meblağ-ı merkūm on guruşu müdde‘î-i merkūma edâ ve teslîme şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 5 min-Şa‘bân sene 1204